Լիբանանում ձերբակալել են Բաշար Ասադի զարմիկի որդուն

Լիբանանում ապօրինի զենք և թմրանյութեր պահելու կասկածանքով ձերբակալել են Սիրիայի տապալված նախագահ Բաշար Ասադի ազգականին և հայտնի թմրավաճառի որդուն, հաղորդել է Associated Press-ը՝ հղում կատարելով լիբանանյան ռազմական և դատական աղբյուրներին։

Սուլեյման Ասադը և Ալի Զեյթերը՝ թմրանյութերի առևտրի մեջ կասկածվող Նուհա Զեյթերի որդին, ուրբաթ ձերբակալվել են Լիբանանի հյուսիսարևելյան Բաալբեկ քաղաքի մոտ։ Անանուն մնալ ցանկացած երկու դատական աղբյուրների տվյալներով՝ տղամարդիկ միասին են եղել։ Սուլեյման Ասադը Հիլալ Ասադի՝ Սիրիայի նախկին նախագահի զարմիկի որդին է։

Լիբանանի բանակը հայտնել է երեք մարդու ձերբակալության մասին, այդ թվում՝ Սիրիայի քաղաքացու, որը չի կարողացել ներկայացնել երկրում իր գտնվելու օրինականությունըը հաստատող փաստաթղթեր։ Զինվորականների տվյալներով՝ ձերբակալվածների մոտ հայտնաբերվել են զենք և հաշիշ։ Բանակը անուններ չի հրապարակել, սակայն նրա հաղորդագրության մեջ նշված սկզբնատառերը համընկել են Սուլեյման Ասադի և Ալի Զեյթերի անունների սկզբնատառերի հետ։ Ձերբակալվածներին հարցաքննել են դատական մարմինների ներկայացուցիչների հսկողությամբ։

Ասադների ընտանիքը Սիրիան ղեկավարել է մոտ հինգ տասնամյակ։ 2024 թվականի դեկտեմբերին Բաշար Ասադի ռեժիմը տապալվել է այն բանից հետո, երբ իշխանությունը զավթել են իսլամիստ ապստամբները։ Դրանից հետո սիրիացի մի շարք պաշտոնյաներ և նախկին նախագահի ազգականներ փախել են այլ երկրներ, այդ թվում՝ Լիբանան։ Ինքը՝ Բաշար Ասադը, և նրա կրտսեր եղբայր Մահերը գտնվում են Ռուսաստանում։

Սուլեյման Ասադի ձերբակալությունը տեղի է ունեցել այն բանից մի քանի շաբաթ անց, երբ Լիբանանը սիրիական իշխանություններին հանձնեց նախկին գեներալ-մայորին, որը դիվիզիայի հրամանատար էր Բաշար Ասադի բանակում։