Անհայտ անձը ներխուժել է ԱՄՆ նախկին փոխնախագահ Քամալա Հարիսի կալվածք

Անհայտ անձը ներխուժել է ԱՄՆ նախկին փոխնախագահ Քամալա Հարիսի՝ Կալիֆոռնիայի Մալիբու քաղաքում գտնվող տան տարածք։ Նրան կանգնեցրել են անվտանգության աշխատակիցները՝ նախքան նա կհասներ տուն։ Այս մասին հայտնում է NBC News-ը։

Միջադեպը տեղի է ունեցել ուրբաթ երեկոյան։ Այդ պահին Քամալա Հարիսը և նրա ամուսինը՝ Դագ Էմհոֆը, տանը չեն եղել։

Հարիսի ներկայացուցիչ Էդուարդո Նեգրոնի խոսքով՝ անհայտ անձին հաջողվել է մտնել կալվածքի տարածք, սակայն մասնավոր անվտանգության աշխատակիցները ժամանակին նկատել և կանգնեցրել են նրան։

Լոս Անջելեսի շրջանի շերիֆի դեպարտամենտից հայտնել են, որ մոտավորապես ժամը 22։30-ին ահազանգ են ստացել Հարիսի նստավայրի տարածքում կասկածելի անձի հայտնվելու մասին։ Դեպքի վայր ժամանած իրավապահները կապ են հաստատել տան մասնավոր անվտանգության աշխատակիցների հետ։

Ոստիկանների ժամանելու պահին տղամարդն արդեն դուրս էր եկել կալվածքի տարածքից։ Իրավապահները նրան նախազգուշացրել են և պահանջել հեռանալ տարածքից։ Տղամարդը կատարել է պահանջը և կամավոր հեռացել, ուստի նրան չեն ձերբակալել։

Ոստիկանությունը դեպքի առնչությամբ ապօրինի ներխուժման մասին հաշվետվություն է կազմել։ Իրավապահները նաև հայտնել են, որ կանխարգելիչ նպատակով կուժեղացնեն այդ տարածքում պարեկությունը։

Քամալա Հարիսը և նրա ամուսինը շնորհակալություն են հայտնել անվտանգության աշխատակիցներին և իրավապահներին՝ արագ արձագանքելու համար։

NBC News-ը հիշեցնում է, որ միջադեպը տեղի է ունեցել այն բանից հետո, երբ ԱՄՆ նախագահ Դոնալդ Թրամփը դադարեցրել էր Հարիսի՝ Գաղտնի ծառայության կողմից իրականացվող պահպանությունը։

ԱՄՆ օրենսդրությամբ նախկին փոխնախագահները, նրանց ամուսինները և մինչև 16 տարեկան երեխաները պաշտոնավարման ավարտից հետո վեց ամիս Գաղտնի ծառայության պահպանության իրավունք ունեն։

2025 թվականի հունվարին, սակայն, այն ժամանակվա նախագահ Ջո Բայդենը հուշագիր էր ստորագրել, որով Հարիսի պահպանության ժամկետը երկարաձգվել էր մինչև 18 ամիս։