Իտալացի Սիմոնե Ռականին հաղթել է Tour of Armenia-ում․ նրան պարգևատրել է Փաշինյանը

Ավարտվել է Հայաստանում առաջին անգամ անցկացված Tour of Armenia միջազգային պրոֆեսիոնալ հեծանվավազքը։

Մրցաշարի ընդհանուր հաշվարկում առաջին տեղը զբաղեցրել է Իտալիայի ներկայացուցիչ Սիմոնե Ռականին՝ «Team Ukyo» թիմից։ Նրան պարգևատրել է ՀՀ վարչապետ Նիկոլ Փաշինյանը։

Երկրորդ տեղը զբաղեցրել է Դանիայի ներկայացուցիչ Քևին Բիելը։ Նրան պարգևատրել է ԿԳՄՍ նախարար Ժաննա Անդրեասյանը։

Երրորդ տեղը զբաղեցրել է Իտալիայի ներկայացուցիչ Լուկա Կովիլին՝ «Bardiani CSF 7 Saber» թիմից։ Մրցանակը նրան հանձնել է Երևանի քաղաքապետ Տիգրան Ավինյանը։

Մրցաշարի լավագույն թիմ է ճանաչվել Չեխիան ներկայացնող ATT Investments-ը։ Թիմին պարգևատրել է ներքին գործերի նախարար Արփինե Սարգսյանը։

Երևանում անցկացված չորրորդ և եզրափակիչ մրցափուլում հաղթել է Իտալիայի ներկայացուցիչ Միշելե Գազոլին։

«Լեռների արքա» անվանակարգում հաղթել է Իտալիայի ներկայացուցիչ Լեոնարդո Վեսկոն, իսկ լավագույն երիտասարդ հեծանվորդ է ճանաչվել Դանիայի ներկայացուցիչ Քևին Բիելը։

Tour of Armenia-ին մասնակցել է աշխարհի տարբեր երկրների 16 թիմ։ Չորս օրերի ընթացքում հեծանվորդներն ընդհանուր առմամբ հաղթահարել են ավելի քան 500 կմ։