Լեհաստանը կործանիչներ է բարձրացրել օդ՝ Ռուսաստանի ակտիվության ֆոնին

Լեհաստանը հերթապահ ռազմական ինքնաթիռներ է բարձրացրել օդ՝ Ուկրաինայում Ռուսաստանի ակտիվության ֆոնին։ Այս մասին հայտնել է Լեհաստանի զինված ուժերի օպերատիվ հրամանատարությունը X սոցիալական ցանցում։

Հաղորդագրության համաձայն՝ ցամաքային հակաօդային պաշտպանության և ռադիոլոկացիոն հետախուզության համակարգերը բերվել են մարտական պատրաստության վիճակի։

Լեհական հրամանատարության պնդմամբ՝ ձեռնարկված միջոցները կանխարգելիչ բնույթ են կրում և նպատակ ունեն ապահովելու այն տարածքների անվտանգությունը, որոնք սահմանակից են «խոցելի շրջաններին»։

Ավելի վաղ Լեհաստանի ազգային պաշտպանության փոխնախարար Պավել Զալևսկին ռուսներին անվանել էր «անողոք և դաժան թշնամի»՝ Լայպցիգում անօդաչու թռչող սարքերի հետ կապված միջադեպին Մոսկվայի ենթադրյալ առնչության վերաբերյալ մեղադրանքների ֆոնին։

Նրա պնդմամբ՝ Ռուսաստանն իրականացնում է այսպես կոչված «հիբրիդային հարձակումներ»՝ նպատակ ունենալով եվրոպացիներին հետ պահել Ուկրաինային աջակցելուց և պառակտել ՆԱՏՕ-ն ներսից։