Թրամփը Կիևին կոչ է արել չհարվածել Ռուսաստանի դիզելային ենթակառուցվածքներին

ԱՄՆ նախագահ Դոնալդ Թրամփը Ուկրաինայի նախագահ Վլադիմիր Զելենսկուն կոչ է արել դադարեցնել հարվածները Ռուսաստանի դիզելային ենթակառուցվածքներին։

«Մենք այդ մասին խոսել ենք պարոն Զելենսկու հետ։ Կան բազմաթիվ այլ թիրախներ։ Մի՛ հարվածեք դիզելային վառելիքին։ Դուք պետք է դադարեցնեք Ռուսաստանում դիզելային վառելիքին հարվածները։ Դա վնաս է հասցնում ամբողջ աշխարհին»,- Թրամփի խոսքը փոխանցում է Reuters-ը։

ԱՄՆ նախագահի խոսքով՝ դիզելային վառելիքի համաշխարհային պակասը պայմանավորված է ոչ թե Մերձավոր Արևելքում ստեղծված իրավիճակով, այլ Ռուսաստանի և Ուկրաինայի միջև տեղի ունեցող զարգացումներով։

Սեպտեմբերի 10-ին ԱՄՆ-ում դիզելային վառելիքի միջին գինն առաջին անգամ գերազանցել է մեկ գալոնի դիմաց 6 դոլարը։

Միաժամանակ Ռուսաստանը 2026 թվականի նավթի արդյունահանման կանխատեսումը նվազեցրել է մինչև վերջին 17 տարվա ամենացածր մակարդակը։ Ուկրաինական հարվածների ֆոնին Ռուսաստանի մի շարք շրջաններում վառելիքի պակաս է արձանագրվել։