Իրանի հետ պատերազմը սպառել է ԱՄՆ զինանոցը. Patriot-ի արտադրությունը ցանկանում են գրեթե եռապատկել – CBS News

Իրանի հետ պատերազմն ԱՄՆ զինանոցում բարձր ճշգրտության զինամթերքի լուրջ պակաս է բացահայտել, իսկ պաշարները մինչպատերազմյան մակարդակին վերադարձնելը կարող է տևել մեկից հինգ տարի՝ կախված սպառազինության տեսակից։ Միաժամանակ այն ծավալներին հասնելու համար, որոնք ամերիկացի զինվորականները բավարար են համարում Չինաստանի հետ հնարավոր հակամարտության դեպքում, կպահանջվի ևս մի քանի տարի, գրում է CBS News-ը։

Ամենացայտուն օրինակներից մեկը Patriot զենիթահրթիռային համակարգի հրթիռներն էին։ Արկանզաս նահանգի Քեմդենում գտնվող Lockheed Martin-ի գործարանում ընկերությունը տարեկան արտադրում է մոտ 750 նման հրթիռ։ Մեկ հրթիռի արժեքը կազմում է մոտ 4 մլն դոլար։ Ռազմավարական և միջազգային հետազոտությունների կենտրոնի (CSIS) գնահատմամբ, Իրանի հետ պատերազմի ընթացքում արձակվել է շուրջ 1,5 հազար Patriot, այսինքն՝ զգալիորեն ավելի, քան ներկայիս տարեկան արտադրության ծավալն է։

«Եթե նրանք արձակում են բալիստիկ հրթիռ, մենք պետք է պաշտպանության համար օգտագործենք մեր բարձր տեխնոլոգիական համակարգերից մեկը», — նշել է CSIS-ի փորձագետ Մարկ Կանսյանը։ Նրա գնահատմամբ, Իրանի դեմ ԱՄՆ-ի կողմից կիրառված զինամթերքի ընդհանուր արժեքը, ներառյալ Patriot, Tomahawk, THAAD և Precision Strike Missile համակարգերը, կազմել է մոտ 25 մլրդ դոլար։

Կանսյանը կարծում է, որ ամերիկյան պաշարները բավարար են Իրանի հետ պատերազմը շարունակելու համար, սակայն Չինաստանի հետ հակամարտության դեպքում իրավիճակը շատ ավելի բարդ է դառնում։ «Մենք, հնարավոր է, կարողանանք ապահովել բավարար քանակությամբ զինամթերք մեկ ամսվա համար, սակայն երկրորդ, երրորդ կամ չորրորդ ամիս անցնելը կդառնա լուրջ խնդիր», — ասել է նա։

Հեռուստաալիքի տեղեկություններով, Lockheed Martin-ը ծրագրում է Patriot-ի արտադրությունը գրեթե եռապատկել՝ հասցնելով տարեկան 2 հազար հրթիռի։ Դրա համար ընկերությունը մտադիր է ավելացնել հերթափոխերը և ընդլայնել արտադրության ավտոմատացումը։ Այժմ մեկ հրթիռի հավաքումը տևում է մոտ վեց շաբաթ, մինչդեռ դրա համար անհրաժեշտ մոտ 4 հազար դետալի արտադրությունը կարող է տևել մինչև երկու տարի։ Մատակարարման շղթային մասնակցում են 500-ից 1000 ընկերություններ, ինչը ստեղծում է ուշացումների լրացուցիչ ռիսկեր։

Նմանատիպ խնդիրներ են առաջանում նաև Patriot-ի հրթիռային շարժիչների արտադրության ժամանակ։ Դրանք արտադրում է մոտակայքում գտնվող L3Harris ընկերությունը, որն արդեն գրեթե կրկնապատկել է արտադրության ծավալը և կառուցում է նոր ավտոմատացված գործարան։ Դրա գործարկումը սպասվում է մոտ 16 ամսից։

Ինչպես նշում է հեռուստաալիքը, թանկարժեք բարձր ճշգրտության սպառազինության դեֆիցիտի ֆոնին Պենտագոնը խաղադրույք է կատարում նաև ավելի էժան հրթիռների վրա։

CoAspire ստարտափը արտադրում է ինքնաթիռներից արձակվող թևավոր հրթիռ՝ մոտ 200 հազար դոլար արժողությամբ, ինչը զգալիորեն ավելի էժան է, քան անալոգների մեծ մասը։ Պենտագոնը ծրագրում է CoAspire-ից և այլ ստարտափներից գնել 10 հազար նման հրթիռ։ Ենթադրվում է, որ դրանց առավելությունը կփոխհատուցվի զանգվածայնությամբ. նույնիսկ բարդ ՀՕՊ համակարգերի համար դժվար կլինի որսալ հազարավոր համեմատաբար պարզ թիրախներ։

Արտադրության մեծացումը տեղի է ունենում այն պայմաններում, երբ ԱՄՆ պաշտպանության նախարար Փիթ Հեգսեթը կոչ է անում պաշտպանական արդյունաբերությունը տեղափոխել «ռազմական ռելսերի վրա» և արագացնել սպառազինության արտադրությունը։

Սակայն CSIS-ի գնահատմամբ, Իրանի հետ պատերազմից առաջ եղած մակարդակին պաշարների վերադարձը կտևի մեկից հինգ տարի, իսկ այնուհետև կպահանջվի ևս մի քանի տարի այնպիսի պահուստներ ձևավորելու համար, որոնք զինվորականները բավարար կհամարեն Չինաստանի հետ պատերազմի համար։