«Նպատակը Արևմուտքին վախեցնելն էր». Կալաս

ԵՄ արտաքին քաղաքականության և անվտանգության հարցերով բարձր ներկայացուցիչ Կայա Կալասը հայտարարել է, որ Ուկրաինայի և Լեհաստանի սահմանին գնացքի ուղղությամբ իրականացված հարվածը, իր գնահատմամբ, նպատակ ուներ վախեցնել արևմտյան երկրներին։ Այս մասին հաղորդում է Reuters-ը։

«Կարծում եմ՝ մենք պետք է ճիշտ հակառակ կերպ վարվենք։ Պետք է ցույց տանք, որ աջակցում ենք Ուկրաինային և չենք վախենում»,— ասել է Կալասը։ Ֆրանսիայի արտգործնախարար Ժան-Նոել Բարոն ևս հայտարարել է, որ հարվածի նպատակը եվրոպացիներին վախեցնելն ու նրանց միջև պառակտում առաջացնելն էր։

Կալասն ու Բարոն կատարվածի համար մեղադրել են Ռուսաստանին, սակայն հրապարակման մեջ նշվում է, որ նրանք Մոսկվայի մասնակցությունը հաստատող ապացույցներ չեն ներկայացրել։ Ավելի վաղ Լեհաստանի վարչապետ Դոնալդ Տուսկը հայտնել էր, որ սեպտեմբերի 13-ին Ուկրաինայի հետ սահմանին մի քանի անօդաչու թռչող սարքեր են արձանագրվել, որոնցից մեկը հարվածել է Կիև–Վարշավա գնացքին, իսկ մյուսն ընկել է Յագոդին–Դորոհուսկ անցակետի մոտ։