Գիտնականը բացատրել է, թե ինչու է մարդկությանը անհրաժեշտ Լուսնի յուրացումը

Լուսինը կարող է դառնալ Արեգակնային համակարգի հետագա յուրացման ճանապարհին առաջին հենակետը։ Այս մասին ՏԱՍՍ-ին հայտնել է Ռուսաստանի գիտությունների ակադեմիայի Տիեզերական հետազոտությունների ինստիտուտի տնօրեն Անատոլի Պետրուկովիչը։

Գիտնականի խոսքով՝ Լուսնի մակերևույթը յուրատեսակ «թանգարան» է, որտեղ պահպանվել են Արեգակնային համակարգի միլիարդավոր տարիների պատմության հետքերը։ Այն ուսումնասիրելը կարող է գիտնականներին կարևոր տեղեկություններ տալ համակարգի ձևավորման և զարգացման մասին։

Պետրուկովիչը նշել է, որ գործնական տեսանկյունից Լուսինը կարող է ծառայել որպես փորձադաշտ և միջանկյալ բազա ավելի հեռավոր տիեզերական առաքելությունների համար։ Այնտեղ հնարավոր կլինի փորձարկել տեխնոլոգիաներ, որոնք հետագայում կարող են կիրառվել, օրինակ, Մարսի յուրացման, տիեզերական ռեսուրսների արդյունահանման կամ Երկիրը աստերոիդներից պաշտպանելու նպատակով։