Մի շարք հայկական ապրանքների մաքսատուրքերը Ինդոնեզիայում կզրոյացվեն

Հայաստանից Ինդոնեզիա մատակարարվող մի շարք ապրանքատեսակների մաքսատուրքերը նախատեսվում է զրոյացնել կամ աստիճանաբար նվազեցնել, քանի որ Ազգային ժողովը վավերացրել է ԵԱՏՄ-ի և Ինդոնեզիայի միջև ազատ առևտրի մասին համաձայնագիրը։

Ըստ ներկայացված նախագծի՝ սահմանված արտոնությունները տարածվում են հայկական արտադրության հանքային ջրերի, պահածոյացված մրգերի ու բանջարեղենի, մրգային հյութերի, պղնձե արտադրանքի, դեղամիջոցների, ինչպես նաև ոսկերչական իրերի վրա։

Գյուղատնտեսական ապրանքների մասով հայկական կողմի առաջարկներում ընդգրկվել են գլխավորապես այն ապրանքատեսակները, որոնք Հայաստանի համար ունեն արտահանման առաջնային հետաքրքրություն։

Փաստաթղթի ուժի մեջ մտնելուց հետո հանքային ջրերի համար ներկայումս գործող 5% մաքսատուրքը կդառնա 0%։ Պահածոյացված մրգերի և բանջարեղենի համար սահմանված 20% դրույքաչափը նույնպես կզրոյացվի, իսկ մրգային հյութերի 5% մաքսատուրքը կնվազի մինչև 0%։ Ջեմերի մասով գործող 5% մաքսատուրքը փաստաթղթի ուժի մեջ մտնելու պահից կկրճատվի 50%-ով։

Արտոնություններ են սահմանված նաև արդյունաբերական ապրանքների համար։ Պղնձե արտադրանքի 5% մաքսատուրքը, ըստ ապրանքատեսակի, կա՛մ անմիջապես կզրոյացվի, կա՛մ 0%-ի կհասնի 3 տարվա ընթացքում։

Դեղամիջոցների համար կիրառվող 5% մաքսատուրքը որոշ ապրանքների դեպքում կզրոյացվի անմիջապես, իսկ առանձին տեսակների համար դրույքաչափը 0%-ի կհասցվի 3–15 տարում։ Ոսկերչական իրերի գործող 15% մաքսատուրքը, համաձայնագրի դրույթների համաձայն, առանձին ապրանքատեսակների համար 5–15 տարվա ընթացքում նախատեսվում է հասցնել 0%-ի։

Բացի այդ, փաստաթուղթը նախատեսում է սակագնային և ոչ սակագնային խոչընդոտների կրճատում, մաքսային ընթացակարգերի դյուրացում, ինչպես նաև գործընկերություն էլեկտրոնային առևտրի, մտավոր սեփականության, մրցակցության, տեխնիկական կարգավորման, սանիտարական և բուսասանիտարական միջոցների ոլորտներում։

Ներկայացված հիմնավորման համաձայն՝ համաձայնագրի կիրարկման արդյունքում նախատեսվում է ավելացնել արտահանման ծավալները, բարձրացնել ԵԱՏՄ անդամ պետությունների ապրանքների մրցունակությունը ինդոնեզական շուկայում և ակտիվացնել առևտրատնտեսական փոխգործակցությունը։