Գիտնականները պարզել են՝ քանի սև խոռոչ կարող է լինել Ծիր Կաթինում

Ծիր Կաթին գալակտիկայում, գիտնականների գնահատմամբ, կարող է գոյություն ունենալ աստղային զանգվածի շուրջ 100 միլիոն սև խոռոչ, մինչդեռ դրանցից մարդկությանը հաստատ հայտնի է ընդամենը մի քանի տասնյակը։ Այս մասին հայտնում է «ՌԻԱ Նովոստի»-ն՝ հղում անելով ՌԴ ԳԱ Լեբեդևի անվան ֆիզիկայի ինստիտուտի Աստղատիեզերական կենտրոնի գիտաշխատող Վյաչեսլավ Ավդեևին։

Աստղային զանգվածի սև խոռոչները սովորաբար ունեն Արեգակի զանգվածը 3-ից մինչև մի քանի հարյուր անգամ գերազանցող զանգված։ Ավդեևի խոսքով՝ դրանց մոտավոր թիվը հաշվարկվել է՝ հաշվի առնելով, թե որքան զանգվածեղ աստղեր են առաջացել նախկինում և առաջանում ներկայում, ինչպես նաև դրանցից քանիսն են կյանքի ավարտին վերածվում սև խոռոչների։

Գիտնականը նաև նշել է, որ Ծիր Կաթինի կենտրոնում գտնվում է մեկ գերզանգվածային սև խոռոչ։ Ընդհանուր առմամբ, Տիեզերքում գերզանգվածային սև խոռոչների թիվը մոտավորապես համադրելի է գալակտիկաների թվի հետ։