ՀՀ նախագահի ունեցվածքը․ նվեր ստացած բնակարան, ժառանգած հողեր և տասնյակ միլիոնների հաշիվներ

Հայաստանի նախագահ Վահագն Խաչատուրյանը 2025 թվականի գույքի և եկամուտների հայտարարագրում ներկայացրել է իր, կնոջ և որդու ունեցած անշարժ գույքն ու ֆինանսական միջոցները։

Հայտարարագրի համաձայն՝ Խաչատուրյանի անունով գրանցված են Երևանի Կենտրոն վարչական շրջանում գտնվող բնակարան և ավտոտնակ։ Երկու գույքն էլ նա ստացել է նվիրատվությամբ՝ 2002 թվականին։ Նախագահին են պատկանում նաև Ձորաղբյուրում և Արաբկիր վարչական շրջանում գտնվող հողամասեր, որոնք 2017 թվականին ստացել է ժառանգությամբ։

2025 թվականի ընթացքում նախագահի բանկային հաշիվների մնացորդը զգալիորեն աճել է։ Տարվա վերջում տարբեր հաշիվներում նա ունեցել է ավելի քան 71 մլն դրամ, բացի այդ՝ հայտարարագրել է 1.5 մլն դրամ կանխիկ և 20 հազար դոլար։ Նախագահի տարեկան եկամուտը կազմել է մոտ 23 մլն դրամ, որը ստացել է նախագահի աշխատակազմից։

Խաչատուրյանի ընտանիքի հայտարարագրում ներկայացված են նաև կնոջ և որդու ֆինանսական միջոցները։ Որդին՝ Արամ Խաչատուրյանը, «Արմենիան քարդ» ընկերությունում աշխատում է որպես առաջատար մասնագետ և տարվա ընթացքում ստացել է ավելի քան 11.2 մլն դրամ եկամուտ։ Տարվա վերջում նրա մոտ առկա է եղել 4.75 մլն դրամ և 2,500 դոլար կանխիկ գումար։

Նախագահի կինը՝ Անահիտ Մինասյանը, հայտարարագրել է Աջափնյակ վարչական շրջանում գտնվող բնակարան, որը ձեռք է բերել դեռևս 1997 թվականին։ Նրա 2025 թվականի եկամուտը կազմել է 712 հազար 320 դրամ՝ կենսաթոշակի տեսքով։ Տարեվերջին նա ունեցել է նաև 2,500 եվրո, 4,000 դոլար և 3.5 մլն դրամ կանխիկ միջոցներ։