Լեհաստանը լրացուցիչ զինուժ կտեղակայի Ուկրաինայի հետ սահմանին

Լեհաստանը պատրաստվում է լրացուցիչ զինուժ ներգրավել Ուկրաինայի հետ սահմանի պաշտպանության համար։ Այս մասին հայտարարել է երկրի ազգային պաշտպանության նախարար Վլադիսլավ Կոսինյակ-Կամիշը՝ Իտալիայի պաշտպանության նախարար Գուիդո Կրոզետոյի հետ հանդիպումից հետո, հայտնում է «ՌԻԱ Նովոստին»։

Նախարարի խոսքով՝ Ուկրաինայի հետ սահմանին անհրաժեշտ է ուժեղացնել սահմանապահ ծառայությունը։ Այդ նպատակով սահմանապահներին աջակցություն կցուցաբերեն ինչպես ինժեներական, այնպես էլ օպերատիվ զորքերը։

Կոսինյակ-Կամիշը նշել է, որ լեհական բանակն այսուհետ ավելի մեծ չափով է ներգրավվելու սահմանապահների աշխատանքին։ Նա հիշեցրել է, որ Լեհաստանն ավելի վաղ զինուժ էր տեղակայել նաև Բելառուսի հետ սահմանին՝ սահմանապահներին աջակցելու նպատակով։