ԵՄ-ն կշարունակի աջակցել Հայաստանի և Ադրբեջանի միջև խաղաղության գործընթացին. ԵՄ ներկայացուցիչ

Հարավային Կովկասում ԵՄ հատուկ ներկայացուցիչ Մագդալենա Գրոնոն ամփոփել է Հայաստանում անցկացրած հերթական խորհրդակցությունները՝ նշելով, որ հանդիպումներ է ունեցել փոխվարչապետ Մհեր Գրիգորյանի, ԱԽ քարտուղար Արմեն Գրիգորյանի, ԱԳ նախարարի տեղակալ Վահան Կոստանյանի և փորձագիտական համայնքի ներկայացուցիչների հետ։

Գրոնոն նշել է, որ Երևանում կրկին հնարավորություն է ունեցել հանդիպելու Արցախից տեղահանված հայերի խմբերի և քաղաքացիական հասարակության ներկայացուցիչների հետ՝ տեղեկանալու նրանց իրավիճակի և հուզող հարցերի մասին։

ԵՄ հատուկ ներկայացուցիչը նաև այցելել է Մեսրոպ Մաշտոցի անվան Մատենադարան։ Նրա խոսքով՝ այցը հնարավորություն է տվել տեղում տեսնելու հայկական մշակույթի հարուստ պատմական ժառանգությունը, այդ թվում՝ հակամարտությունից տուժած շրջաններից ծագող նմուշներ։

«ԵՄ-ն կշարունակի աշխատանքը Հայաստանի և Ադրբեջանի միջև երկկողմ խաղաղության գործընթացին աջակցելու ուղղությամբ»,- նշել է Գրոնոն։