Ռազմական օդանավակայանի մոտ անհայտ դրոնի բեկորներ են հայտնաբերվել Գերմանիայում

Գերմանիայում ոստիկանությունը Ստորին Սաքսոնիայում, Վունստորֆի ռազմական օդանավակայանից մոտ մեկ կիլոմետր հեռավորության վրա, ենթադրաբար կործանված անօդաչու թռչող սարքի բեկորներ հայտնաբերվելուց հետո լայնածավալ գործողություն է իրականացնում, հայտնում է Bild պարբերականը։

Բեկորները հայտնաբերվել են Շտայնհուդե լճից արևելք՝ Հանովերի մոտ գտնվող անմարդաբնակ տարածքում։ Հայտնաբերման մասին տեղեկությունը Ստորին Սաքսոնիայի երկրամասային քրեական ոստիկանության վարչություն (LKA) էր հասել դեռևս երկուշաբթի։ Երեքշաբթիից ոստիկանության տասնյակ աշխատակիցներ զննում են լայնատարած տարածքը՝ անօդաչուի մնացած մասերը գտնելու նպատակով։

Վունստորֆի օդանավակայանն օգտագործում է Բունդեսվերը. այնտեղ տեղակայված են Airbus A400M ռազմական տրանսպորտային ինքնաթիռներ։ Ոստիկանությունում հաստատել են, որ բեկորների հայտնաբերման վայրը գտնվում է ռազմական օբյեկտից մոտ մեկ կիլոմետր հեռավորության վրա։ Միևնույն ժամանակ, բեկորները հայտնաբերվել են ոչ թե օդանավակայանի տարածքում։

Առայժմ հայտնի չէ, թե ում էր պատկանում անօդաչու թռչող սարքը և ով էր այն կառավարում։ Քննիչները հույս ունեն գտնել լրացուցիչ բեկորներ, այնուհետև ուսումնասիրել դրանք և պարզել անկման հանգամանքները։ LKA-ն տեղի ունեցածը դիտարկում է որպես իրավիճակ, որը ստուգում է պահանջում՝ հնարավոր սպառնալիքը կանխելու նպատակով։

Ոստիկանությունում առայժմ չեն բացառում ո՛չ թռիչքի հետախուզական բնույթը, ո՛չ էլ այդ շրջանում դրոնի հայտնվելու անվնաս պատճառը։ Ըստ LKA-ի ներկայացուցիչների՝ այս պահին բնակչության համար վտանգի որևէ նշան չկա։

Որոնողական գործողության լայնածավալությունը բացատրվում է նաև տեղանքի առանձնահատկություններով. տարածքը մեծ է և անմարդաբնակ, իսկ անօդաչուի փոքր բեկորները ստիպված են որոնել բարձր խոտի և թփուտների մեջ։ Հետաքննությունը շարունակվում է։