Իրանի հարվածներից ԱՄՆ-ի ռազմաբազաների ավերածությունների բացառիկ կադրերը․ վնասվել է նաև E-3 Sentry ինքնաթիռ

ԱՄՆ-ի CBS հեռուստաալիքը հրապարակել է բացառիկ լուսանկարներ, որոնք ցույց են տալիս Մերձավոր Արևելքում ամերիկյան մի շարք ռազմական օբյեկտների՝ իրանական հրթիռային և անօդաչու թռչող սարքերի հարվածներից կրած լայնածավալ վնասները։

Լուսանկարները CBS News-ին փոխանցել են գործող ամերիկացի զինծառայողները՝ անանունության պայմանով՝ բանակում գործող խիստ մեդիա սահմանափակումների պատճառով։

Լուսանկարներից մեկում, որն արվել է Սաուդյան Արաբիայի Փրինս Սուլթան ավիաբազայում, երևում է ուղիղ հարված ստացած չորսշարժիչ Boeing E-3 Sentry ինքնաթիռը։

Մյուս կադրերում երևում են այրված շինություններ և զորանոցներ։ Դրանց կողքին կանգուն են մնացել բետոնե պաշտպանիչ պատերը՝ այսպես կոչված T-walls, որոնք նախկինում համարվում էին հուսալի պաշտպանություն, սակայն օդային հարվածների դեմ արդյունավետ չեն եղել։

Ծանր վնասներ են արձանագրվել նաև Քուվեյթի Քեմփ-Բյուրինգ ռազմաբազայում։

ԱՄՆ ՊՆ գլխավոր տեսուչի նոր զեկույցի համաձայն՝ Իրանի դեմ պատերազմի ընթացքում տեխնիկայի կորուստների արժեքը կարող է հասնել 3,7 միլիարդ դոլարի, այդ թվում՝ գրեթե 60 ինքնաթիռի։ Զեկույցում նշվում է, որ ԱՄՆ Կենտրոնական հրամանատարությունը գրանցել է իրանական հարվածներ ամերիկյան բազաների ուղղությամբ Քուվեյթում, Բահրեյնում, Կատարում, ԱՄԷ-ում, Սաուդյան Արաբիայում, Իրաքում, Օմանում և Հորդանանում։

Պենտագոնը CBS-ի մեկնաբանության հարցմանը չի պատասխանել։