Ֆիդան. Մեքքայի համաձայնագրի կողմերը քննարկում են համատեղ գլխավոր շտաբի կառուցվածքը

Թուրքիան, Սաուդյան Արաբիան և Պակիստանը շարունակում են աշխատել պաշտպանության ոլորտում Մեքքայի դաշինքի ինստիտուցիոնալացման ուղղությամբ և քննարկում են Գլխավոր շտաբի ապագա կառուցվածքը, «Այդընլիկ» թերթին ասել է Թուրքիայի արտաքին գործերի նախարար Հաքան Ֆիդանը։

«Մեքքայի դաշինքի ինստիտուցիոնալացման գործընթացը շարունակվում է։ Երեք երկրները տեխնիկական քննարկումներ են անցկացնում այս հարցի շուրջ։ Մենք քննարկում ենք Գլխավոր շտաբի կառուցվածքը և ստեղծվող յուրաքանչյուր ստորաբաժանման չափը։ Այս գործընթացը մոտենում է ավարտին», - ասել է նախարարը։

Նա նաև հավելել է, որ «նպատակն է ընդլայնել Մեքքայի դաշինքը», և «այս համատեքստում հետագա քայլերը կլինեն ավելի կոնկրետ»։

Սաուդյան Արաբիայի թիրախների վրա հարձակումների վերաբերյալ Ֆիդանը նշել է, որ դրանք անընդունելի են։ «Իրաքում տեղակայված ագրեսորների կողմից Սաուդյան Արաբիայի վրա հարավից և հյուսիսից հարձակումները անընդունելի են։ Ոչ ոք չի կարող անտարբեր մնալ այս գործողությունների նկատմամբ, որոնք ուղղված են Սաուդյան Արաբիան հյուսիսից և հարավից շրջապատելուն, կարևորագույն ենթակառուցվածքները ոչնչացնելուն և վնաս հասցնելուն ոչ միայն Սաուդյան Արաբիային, այլև ամբողջ տարածաշրջանին», - նշել է նա։

Ֆիդանը նաև հավելել է, որ ստեղծված իրավիճակում Թուրքիան «գործում է Մեքքայի համաձայնագրի ոգուն համապատասխան»։ Սակայն նա չմանրամասնեց, թե ինչ քայլեր է ձեռնարկում։