«Իրավիճակը հասել է կրիտիկական կետի». ֆոն դեր Լայենը զգուշացրել է Չինաստանից ԵՄ-ի վտանգավոր կախվածության մասին

Եվրամիությունը չափազանց մեծ կախվածության մեջ է հայտնվել Չինաստանից՝ կարևոր հումքի մատակարարումների հարցում։ Այս մասին հայտարարել է Եվրահանձնաժողովի նախագահ Ուրսուլա ֆոն դեր Լայենը։ Նրա խոսքով՝ մի շարք կարևոր հումքային նյութերի դեպքում Չինաստանից կախվածությունը գերազանցում է 80%-ը, իսկ որոշ հազվագյուտ հողային տարրերի դեպքում հասնում է 90%-ի։

Ֆոն դեր Լայենը նշել է, որ Չինաստանի հետ ԵՄ առևտրային դեֆիցիտը հասել է օրական մոտ 1 միլիարդ եվրոյի։ Նրա գնահատմամբ՝ իրավիճակը հասել է կրիտիկական կետի և արդեն բացասաբար է անդրադառնում եվրոպական արդյունաբերության վրա։

Եվրահանձնաժողովի նախագահը հայտնել է, որ Բրյուսելը շարունակում է Պեկինի հետ բանակցությունները՝ առևտրային հարաբերությունները հավասարակշռելու համար։ Միաժամանակ նա հայտարարել է, որ արդյունքի բացակայության դեպքում ԵՄ-ն պատրաստ է կիրառել իր տրամադրության տակ եղած գործիքները՝ եվրոպական արդյունաբերությունը պաշտպանելու և Չինաստանից կախվածությունը նվազեցնելու համար։