Այս տարի գրիպի դեմ պատվաստումը հատկապես կարևոր է․ վիրուսաբանը նշել է պատճառը

Այս տարի գրիպի դեմ պատվաստանյութի բոլոր երեք բաղադրիչները փոխվել են, ինչի պատճառով պատվաստվելը հատկապես կարևոր է։ Այս մասին հայտարարել է ՌԴ ԳԱ ակադեմիկոս, վիրուսաբան Սերգեյ Նետեսովը, փոխանցում է ՌԻԱ Նովոստին։

Նրա խոսքով՝ գրիպի վիրուսները մշտապես փոփոխվում են, ուստի պատվաստանյութի բաղադրությունը պարբերաբար թարմացվում է։ Սակայն այս տարի իրավիճակն առանձնահատուկ է, քանի որ միաժամանակ փոխվել են պատվաստանյութի բոլոր երեք բաղադրիչները։ Դրանք նախատեսված են գրիպի՝ հոնկոնգյան տիպի, H1N1 համավարակային («խոզի գրիպ») և B տիպի վիրուսների դեմ։

Նետեսովը հատկապես խորհուրդ է տվել պատվաստվել նրանց, ովքեր վերջին մեկ-երկու տարիներին չեն պատվաստվել, ինչպես նաև ռիսկային խմբերում գտնվող մարդկանց՝ 65 տարեկանից բարձր անձանց, իմունային անբավարարություն, սրտանոթային հիվանդություններ կամ շաքարային դիաբետ ունեցողներին։