«Այդպես չպետք է լիներ». Արարատի մոտ հայտնաբերված անոմալիան տարակուսանքի մեջ է գցել գիտնականներին

Արարատ լեռան ստորոտում՝ Թուրքիայի Աղրը նահանգում, գիտնականները նոր տվյալներ են ստացել այսպես կոչված Դուրուփինարի գոյացության վերաբերյալ, որը տարիներ շարունակ կապվում է Նոյան տապանի հնարավոր գտնվելու վայրի հետ։ Այս մասին գրում է ՌԻԱ Նովոստին։

Գեոռադարային հետազոտությունների ընթացքում հողի տակ հայտնաբերվել են համեմատաբար կանոնավոր եզրերով և ուղիղ անկյան տակ հատվող կառուցվածքներ։ Հետազոտությանը մասնակցող պրոֆեսոր Չենքեր Աթիլայի խոսքով՝ դրանք կարող են վկայել ստորգետնյա խոռոչների կամ բաժանարար կառուցվածքների առկայության մասին։ Սակայն միայն ռադարային տվյալներով հնարավոր չէ պարզել՝ դրանք բնական գոյացություններ են, թե այլ ծագում ունեն։

Հողի նմուշների նախնական հետազոտությունն էլ ցույց է տվել, որ անոմալիայի տարածքում ածխածնի մակարդակը մոտ 40 տոկոսով բարձր է հարակից տարածքներից։ Գիտնականների կարծիքով՝ դա կարող է վկայել օրգանական նյութերի, այդ թվում՝ փայտի առկայության մասին, սակայն այս վարկածը դեռ հաստատված չէ։ Հետազոտողները նախատեսում են ընդլայնել նմուշների ուսումնասիրությունը՝ բարձր ածխածնի այլ հնարավոր պատճառները բացառելու համար։

Դուրուփինարի նավանման գոյացությունը գիտնականների ուշադրության կենտրոնում է դեռ 1959 թվականից։ Վերջին տվյալները, ըստ հետազոտողների, մեծացնում են հետաքրքրությունը Նոյյան տապանի վարկածի նկատմամբ, սակայն դրա իսկությունը հաստատող վերջնական գիտական ապացույցներ առայժմ չկան։