Փաշինյան. Հայաստանը երբեք չի բարձրացրել ռուսական ռազմաբազան երկրից դուրս բերելու հարցը

Հայաստանի վարչապետ Նիկոլ Փաշինյանը հայտարարել է, որ 2018 թվականից ի վեր Ռուսաստանի նախագահ Վլադիմիր Պուտինի և ռուսաստանցի այլ բարձրաստիճան պաշտոնյաների հետ շփումներում երբեք չի բարձրացրել Գյումրիում տեղակայված ռուսական 102-րդ ռազմաբազան Հայաստանից դուրս բերելու հարցը, այս մասին հայտնում է Lenta.ru-ն։

Փաշինյանի խոսքով՝ ռազմաբազայի թեման օրակարգում հայտնվել է Բիշքեկում Ռուսաստանի նախագահի հետ հանդիպումից հետո հնչած հայտարարությունների համատեքստում։ Նա ավելի վաղ նաև նշել էր, որ Բիշքեկում Պուտինի հետ հանդիպման ժամանակ ռազմաբազայի դուրսբերման հարց չի քննարկվել։

Վարչապետը միաժամանակ ընդգծել է, որ Հայաստանը ռուսական ռազմաբազայի ներկայությունը «կենսական անհրաժեշտություն» չի համարում։ Նրա խոսքով՝ եթե Ռուսաստանը որոշի դուրս բերել ռազմաբազան, Երևանը չի առարկի, իսկ եթե Մոսկվան ցանկանա պահպանել այն Հայաստանում, հայկական կողմը պատրաստ է այդ հարցը քննարկել։