Ռյուտեն Թրամփի ճնշումը ՆԱՏՕ-ի դաշնակիցների վրա համեմատել է «ադրենալինի չափաբաժնի» հետ

ԱՄՆ նախագահ Դոնալդ Թրամփի՝ ՆԱՏՕ-ի դաշնակիցների վրա գործադրած ճնշումը՝ ռազմական ծախսերը մեծացնելու պահանջով, դարձել է դաշինքի համար անհրաժեշտ «ադրենալինի չափաբաժին»։ Նման կարծիք է հայտնել Հյուսիսատլանտյան ռազմական դաշինքի գլխավոր քարտուղար Մարկ Ռյուտեն։

«Պետք է արժանին մատուցել նախագահ Թրամփին։ Ես գիտեմ, որ նա ուժեղ ճնշում էր գործադրում պաշտպանական ծախսերի հարցում, բայց, ի վերջո, նա իրավացի է։ Մեզ անհրաժեշտ էր ադրենալինի այդ չափաբաժինը», - հայտարարել է Ռյուտեն՝ ելույթ ունենալով բրիտանական Ditchley Foundation հիմնադրամի միջոցառման շրջանակում անցկացվող ամենամյա դասախոսությամբ։ Գլխավոր քարտուղարի գնահատմամբ՝ այդ ֆոնին Եվրոպայի երկրները զգացել են «նոր վճռականություն»՝ ՆԱՏՕ-ին անհրաժեշտ ռեսուրսներն ապահովելու, ուժերն ու հնարավորությունները և դաշինքի մարտական պատրաստվածությունը բարձրացնելու համար։

Ներդրումների առաջնահերթ ուղղությունների թվում Ռյուտեն նշել է մեծ հեռահարության բարձր ճշգրտության խոցման միջոցները, ինտեգրված հակաօդային և հակահրթիռային պաշտպանության համակարգերը, անօդաչու սարքերն ու հետախուզական ներուժը։ Նա հիշեցրել է, որ միայն ՆԱՏՕ-ի վերջին գագաթնաժողովում դաշնակիցները հայտարարել են ավելի քան 50 միլիարդ դոլարի սպառազինության նոր գնումների մասին։

Վերջին տարիներին Թրամփի վարչակազմը սկսել է Եվրոպայում ամերիկյան ռազմական ներկայության վերանայումը։ Վաշինգտոնը հայտարարել է Գերմանիայից շուրջ 5 հազար զինծառայողի դուրսբերման և մի շարք համատեղ ծրագրերի կրճատման մասին, ինչպես նաև սկսել է եվրոպական ուղղությամբ ամերիկյան ուժերի տեղակայման համապարփակ ստուգում։ ԱՄՆ իշխանություններն այդ քայլերը բացատրում են ռեսուրսների վերաբաշխման անհրաժեշտությամբ և եվրոպացի դաշնակիցներին կոչ են անում սեփական անվտանգության ապահովման ավելի մեծ պատասխանատվություն ստանձնել և ավելացնել պաշտպանական ծախսերը։