Պատմական հանդիպում Սպիտակ տանը․ հայ հոգևոր առաջնորդները՝ Թրամփի հետ

Հայաստանի դեսպանության նախաձեռնությամբ և Սպիտակ տան Հավատքի գրասենյակի հետ համագործակցությամբ՝ ԱՄՆ-ի հայ հոգևոր առաջնորդները հանդիպել են ԱՄՆ նախագահ Դոնալդ Թրամփին՝ Սպիտակ տանը։

Այս մասին իր ֆեյսբուքյան էջում հայտնել է Ամերիկայի Միացյալ Նահանգներում ՀՀ արտակարգ և լիազոր դեսպան Նարեկ Մկրտչյանը։

Նրա խոսքով՝ հանդիպումը տեղի է ունեցել Օվալաձև աշխատասենյակում, իսկ քննարկման առանցքում եղել են քրիստոնեական և քաղաքակրթական արժեքները, կրոնական ազատությունն ու խաղաղությունը։

Քննարկվել է նաև Հայաստանի՝ որպես առաջին քրիստոնյա պետության պատմական և հոգևոր ժառանգությունը, ինչպես նաև դրա նշանակությունը հայ-ամերիկյան հարաբերություններում։

Մկրտչյանը նշել է, որ հանդիպման ընթացքում միասին աղոթել են Հայաստանի և ԱՄՆ-ի բարօրության, ինչպես նաև նախագահ Թրամփի՝ խաղաղության հաստատմանն ուղղված ջանքերի համար։

Հանդիպմանը մասնակցել են Հայ Առաքելական, Մեծի Տանն Կիլիկիո Կաթողիկոսության, Հայ Կաթողիկե և Հայ Ավետարանական եկեղեցական կառույցների հոգևոր առաջնորդներ։