Հնարավո՞ր է դեմքի արտաքին տեսքով որոշել երկաթի պակասը․ բժիշկը պարզաբանել է

Մարդու արտաքին տեսքով հնարավոր չէ վստահորեն որոշել՝ օրգանիզմում երկաթի կամ ֆերիտինի մակարդակը ցածր է, թե ոչ։ Արյունաբան Իմո Ակպանը The Washington Post-ի հետ զրույցում պարզաբանել է, որ սոցցանցերում տարածված՝ այսպես կոչված «ֆերիտինային դեմք» հասկացությունը բժշկության մեջ գոյություն չունի։

Մասնագետի խոսքով՝ երկաթի արտահայտված պակասի, հատկապես արդեն զարգացած անեմիայի դեպքում, մաշկը կարող է գունատ և չոր դառնալ, մազերն ու եղունգները՝ փխրուն, իսկ բերանի անկյուններում երբեմն ճաքեր են առաջանում։ Սակայն եթե երկաթի պակասը դեռ չի հանգեցրել անեմիայի, ավելի հաճախ նկատվում են հոգնածություն, ֆիզիկական ծանրաբեռնվածության ժամանակ շնչահեղձություն և գլխապտույտ, այլ ոչ թե դեմքի արտաքին փոփոխություններ։

Բժիշկն ընդգծել է, որ երկաթի պակասը հնարավոր է պարզել միայն արյան հետազոտության միջոցով։ Ֆերիտինի անալիզը ցույց է տալիս օրգանիզմում երկաթի պաշարները։ Նա նաև զգուշացրել է առանց բժշկի նշանակման երկաթի հավելումներ ընդունելուց, քանի որ նման ախտանշանները կարող են կապված լինել նաև այլ խնդիրների, այդ թվում՝ վահանաձև գեղձի հիվանդությունների հետ, իսկ երկաթի ավելցուկը կարող է վնասել առողջությանը։