Ադրբեջանցի պատգամավոր․ Ադրբեջանը կարող է Հայաստանի տարածքում հուշարձաններ վերականգնելու նախաձեռնություններ առաջ քաշել

Ադրբեջանի Միլի Մեջլիսի հասարակական միավորումների և կրոնական կազմակերպությունների հարցերի հանձնաժողովի նախագահ Ֆազիլ Մուստաֆան հայտարարել է, որ Բաքուն ապագայում կարող է նախաձեռնություններ առաջ քաշել ներկայիս Հայաստանի տարածքում գտնվող պատմամշակութային և կրոնական հուշարձանների ու մզկիթների վերականգնման ուղղությամբ։ Այդ մասին հայտնում են ադրբեջանական լրատվամիջոցները։

Մուստաֆայի խոսքով՝ նման հնարավորություն կարող է առաջանալ խաղաղության համաձայնագրի ստորագրումից հետո։ Նա նշել է, որ այդ դեպքում կարող է քննարկվել նաև տվյալ տարածքներում գտնվող մզկիթների և այլ պատմամշակութային ու կրոնական հուշարձանների վերականգնման հարցը։

Ադրբեջանցի պատգամավորը հայտարարությունն արել է պատմամշակութային և կրոնական ժառանգության պահպանմանը նվիրված միջոցառման ժամանակ՝ Հայաստանի տարածքը ներկայացնելով Ադրբեջանի կողմից առաջ մղվող «Արևմտյան Ադրբեջանի» հայեցակարգի համատեքստում։