Սլովակիայի ԱԳ նախարարը դժգոհել է, որ ֆոն դեր Լայենը չի խոսել Ուկրաինայում խաղաղության հասնելու ուղիների մասին

Սլովակիայի արտաքին գործերի նախարար Յուրայ Բլանարը հիասթափություն է հայտնել, որ Եվրահանձնաժողովի նախագահ Ուրսուլա ֆոն դեր Լայենը Եվրախորհրդարանում իր ծրագրային ելույթում չի անդրադարձել Ուկրաինայում հակամարտության խաղաղ կարգավորման հնարավորություններին։ Նրա խոսքերը փոխանցում է սլովակյան TASR գործակալությունը։

Բլանարի խոսքով՝ ֆոն դեր Լայենը խոսել է Ուկրաինային ռազմական աջակցությունը շարունակելու և Ռուսաստանի նկատմամբ նոր պատժամիջոցներ սահմանելու մասին, սակայն իր ելույթում չի ներկայացրել խաղաղության հասնելուն կամ խաղաղ նախաձեռնություններին միանալուն վերաբերող առաջարկներ։ Սլովակիայի ԱԳ նախարարը նաև պնդել է, որ Ռուսաստանի դեմ մինչ այժմ կիրառված պատժամիջոցները չեն տվել ակնկալվող արդյունքը։

Բլանարը նաև ուշադրություն է հրավիրել այն հանգամանքի վրա, որ Եվրամիությունը, իր գնահատմամբ, դեռևս անմիջականորեն ներգրավված չէ այն բանակցություններում, որտեղ քննարկվում են հակամարտության ավարտի պայմանները։