Ինչո՞ւ կարող է լյարդի ցիռոզը զարգանալ դեռ մինչև 50 տարեկանը․ գիտնականները բացահայտել են հիմնական գործոնները

Ժառանգական նախատրամադրվածության և նյութափոխանակության խանգարումների համակցությունը կարող է արագացնել լյարդի ճարպային հիվանդության զարգացումը և հանգեցնել ցիռոզի համեմատաբար երիտասարդ տարիքում։ Հատկապես նշանակալի կապ է հայտնաբերվել 2-րդ տիպի շաքարային դիաբետի հետ։ Հետազոտությունը հրապարակվել է Clinical Gastroenterology and Hepatology գիտական ամսագրում։

Գիտնականներն ուսումնասիրել են նյութափոխանակության խանգարումների հետ կապված լյարդի ճարպային հիվանդություն (MASLD) ունեցող մոտ 2400 մարդու տվյալներ։ Նրանցից մոտ յուրաքանչյուր չորրորդի մոտ ցիռոզը զարգացել է մինչև 50 տարեկանը։ Հետազոտողները պարզել են, որ այս խմբում հաճախ միաժամանակ առկա են եղել ինչպես գենետիկ ռիսկի գործոններ, այնպես էլ նյութափոխանակության խանգարումներ։

Հետազոտությունը նաև ցույց է տվել, որ ռիսկի գնահատման ներկայիս որոշ մեթոդներ կարող են երիտասարդների դեպքում թերագնահատել հիվանդության ծանրացման հավանականությունը, քանի որ հաշվարկներում հաշվի են առնում տարիքը։ Վաղ զարգացած ցիռոզ ունեցող մարդկանց գրեթե մեկ երրորդի դեպքում ստանդարտ թեստերը լրացուցիչ հետազոտության անհրաժեշտություն չեն ցույց տվել։ Գիտնականների խոսքով՝ 2-րդ տիպի շաքարային դիաբետ, ճարպակալում կամ ժառանգական բարձր ռիսկ ունեցող մարդկանց համար կարող է կարևոր լինել լյարդի վիճակի ավելի վաղ վերահսկումը։