Nestlé-ն արձագանքել է Ռուսաստանում իր ակտիվները ժամանակավոր կառավարման հանձնելու որոշմանը

Շվեյցարական Nestlé ընկերությունն արձագանքել է Ռուսաստանի նախագահ Վլադիմիր Պուտինի հրամանագրին, որով Ռուսաստանում ընկերության ակտիվները հանձնվել են ժամանակավոր արտաքին կառավարման։ Ընկերության կարճ հայտարարությունը հրապարակվել է նրա պաշտոնական կայքում։

Nestlé-ն հայտնել է, որ ձեռնարկելու է անհրաժեշտ բոլոր քայլերը՝ իր իրավունքները պաշտպանելու և գործունեության շարունակականությունն ապահովելու համար՝ առաջին հերթին հաշվի առնելով աշխատակիցների շահերը։ Թե կոնկրետ ինչ քայլեր են նախատեսվում, ընկերությունը չի մանրամասնել։

Սեպտեմբերի 17-ին Պուտինի հրամանագրով ժամանակավոր կառավարման են հանձնվել նաև Auchan-ի, FM Logistics-ի, Bati Logistics-ի և նախկին «Լերուա Մերլենի»՝ «Լե Մոնլիդ» ՍՊԸ-ի ռուսական ակտիվները։ Ըստ հրապարակման՝ մոտ մեկ տրիլիոն ռուբլի ընդհանուր արժեքով ակտիվների կառավարումը փոխանցվել է Մոսկվայում գրանցված «Լ.Ե.Վ. Մենեջմենթ» ընկերությանը։