Ռուսաստան–ԱՄԷ չվերթների ուղևորներից մեկ շաբաթում ավելի քան 2 մլն ռուբլի են գողացել

Ռուսաստանից ԱՄԷ մեկնող չվերթների մի շարք ուղևորներ հայտնել են, որ թռիչքի ընթացքում իրենց ձեռքի ուղեբեռից կանխիկ գումար է անհետացել։ Baza-ի տվյալներով՝ մեկ շաբաթվա ընթացքում գողացված գումարի ընդհանուր չափը գերազանցել է 2 մլն ռուբլին։

Դեպքերից մեկը տեղի է ունեցել սեպտեմբերի 14-ին՝ Մոսկվա–Դուբայ չվերթում։ Ուղևորներից մեկը վայրէջքից հետո հայտնաբերել է, որ իր ուսապարկից անհետացել է 1100 դոլար և 1700 դիրհամ։ Ավելի ուշ ոստիկանությունում նա հանդիպել է նույն չվերթի ևս երեք ուղևորի, որոնցից երկուսը հայտնել են 10-ական հազար դոլարի կորստի մասին։ Նրանց խոսքով՝ պայուսակներում մանր թղթադրամները թողել էին, որպեսզի գողությունը միանգամից չնկատվի։

Նմանատիպ դեպք է գրանցվել նաև Սոչիից Աբու Դաբի մեկնող Etihad-ի չվերթում։ Ամուսինները պնդել են, որ իրենց պայուսակում եղած 14 հատ 100-դոլարանոց թղթադրամներից 13-ը փոխարինվել են մեկդոլարանոցներով։ Տուժածները ենթադրում են, որ գումարը կարող էին վերցնել վերևի դարակներում պահվող ձեռքի ուղեբեռից հենց թռիչքի ընթացքում։ Դեպքերի հանգամանքները պարզվում են։