Վիլնյուսի կենտրոնում բարի մոտ այրել են Ղուրանը․ ոստիկանությունը հետաքննություն է սկսել

Վիլնյուսի կենտրոնում բարի մոտ այրել են Ղուրանը՝ իսլամի սուրբ գիրքը, հաղորդել է Delfi-ն։

Միջադեպը տեղի է ունեցել սեպտեմբերի 13-ի գիշերը Էտմոնու փողոցում։ Ոստիկանությունը սկսել է մինչդատական հետաքննություն՝ հասարակական կարգը խախտելու փաստով։

Վիլնյուսի շրջանի ոստիկանության գլխավոր կոմիսարիատի ներկայացուցիչը Delfi-ին հաստատել է, որ տեղի ունեցածի մասին հաղորդումը ստացվել է սեպտեմբերի 13-ին, ժամը 01:57-ին։ Միևնույն ժամանակ, ոստիկանության ամենօրյա ամփոփագրում միջադեպի մասին տեղեկություն չէր հրապարակվել։

Սոցիալական ցանցերում տարածվել է տեղի ունեցածի տեսագրությունը։ Instagram-ում հրապարակված կադրերում մի քանի մարդիկ կանգնած են այրվող գրքի մոտ՝ ձեռքներին գավաթներ։

Դրվագներից մեկում դիմակով երիտասարդը ձեռքերը մեկնում է դեպի կրակը։ Նրա բաճկոնի թևքին նկատվում է լիտվական դրոշի պատկերով տարբերանշան։

Ոստիկանությունը պարզում է տեղի ունեցածի հանգամանքները և թե ով է առնչություն ունեցել միջադեպին։

Հետաքննությունն իրականացվում է հասարակական կարգը խախտելու մասին հոդվածով։ Լիտվայի օրենսդրության համաձայն՝ շրջապատի կամ հասարակական միջավայրի նկատմամբ ցուցադրական անհարգալից վերաբերմունքի համար, որն արտահայտվել է լկտի վարքով, սպառնալիքներով, չարամիտ ծաղրով կամ վանդալիզմով և հանգեցրել է հասարակական կարգի խախտման, նախատեսվում են հանրային աշխատանքներ, տուգանք, ազատության սահմանափակում, կալանք կամ ազատազրկում մինչև երկու տարի ժամկետով։