Բժիշկը զգուշացրել է աշնանը սրտի հետ կապված ռիսկերի մասին

Սրտային խնդիրները կարող են սրվել աշնան գալուստով, «Իզվեստիա»-ին տված հարցազրույցում ասել է նյարդաբան Ալեքսեյ Մամատովը։

«Աշնանը սրտանոթային համակարգի համար ամենաանսպասելի վտանգը երբեմն ոչ թե բուն ցուրտն է, այլ այն, թե ինչպես ենք մենք վարվում դրա պատճառով։ Եթե ամռանը մարդը կարող է ամեն օր շատ քայլել, ապա աշնանը ֆիզիկական ակտիվությունը հաճախ զգալիորեն նվազում է։ Արդյունքում՝ ընդամենը մի քանի շաբաթվա ընթացքում փոխվում է արյան շրջանառության ամբողջ համակարգի աշխատանքը», — նշել է Մամատովը։

Բժիշկը սրտանոթային համակարգի համար աշնանային մեկ այլ ռիսկ է համարել սննդակարգի փոփոխությունները։ Նա նշել է, որ այս եղանակին մարդիկ հակված են ավելի շատ աղ, շաքար և սուրճ օգտագործել, ինչը հաճախ ուղեկցվում է ջրի անբավարար ընդունմամբ։ Բացի այդ, աշնանը սրտանոթային համակարգի վրա լրացուցիչ ծանրաբեռնվածություն է առաջացնում սթրեսը. բժիշկը բացատրել է, որ դա հաճախ պայմանավորված է լինում աշխատանքային ծանրաբեռնվածության աճով։

Մամատովը նշել է, որ չորս կանոնի պահպանումը կարող է օգնել պաշտպանվել այդ ռիսկերից՝ բավարար ֆիզիկական ակտիվություն, լիարժեք քուն, բավարար քանակությամբ ջրի օգտագործում և հավասարակշռված սննդակարգ։

Մասնագետը պարզաբանել է, որ ինքնազգացողության փոփոխությունները միշտ չէ, որ կապված են լինում բացառապես աշնան գալուստի հետ։ «Երբեմն պացիենտը դիմում է կոնկրետ գանգատով, օրինակ՝ սրտի հետ կապված խնդիրներով, սակայն պարզվում է, որ խնդիրն ավելի լայն է և ներառում է անոթային դիսֆունկցիա, սննդանյութերի պակաս կամ նյութափոխանակության և հորմոնալ փոփոխություններ», — ընդգծել է բժիշկը։