Զելենսկին Ռուսաստանին «ջախջախելու» համար ևս 40 օր է խնդրել

Ուկրաինային ևս 40 օր է անհրաժեշտ՝ Ռուսաստանին ռազմական գործողությունները դադարեցնել ստիպելու համար։ Այս մասին Անդրկարպատիայում կայացած գագաթնաժողովում հայտարարել է Ուկրաինայի նախագահ Վլադիմիր Զելենսկին։ Նրա խոսքով՝ Ուկրաինայի զինված ուժերը մտադիր են ավելացնել Ռուսաստանի տարածքին հասցվող հարվածների քանակը։

«Մեզ ևս 40 օր է պետք Ռուսաստանին ջախջախելու համար»,- հայտարարել է Զելենսկին։

Աղբյուրը հիշեցնում է, որ ավելի վաղ Զելենսկին հայտարարել էր Ռուսաստանին խաղաղության պարտադրելու 40-օրյա արշավ սկսելու մասին։ Հրապարակման պնդմամբ՝ այն ներառում էր Ռուսաստանի տարածքում քաղաքացիական օբյեկտներին հասցվող հարվածներ, ինչպես նաև Սև և Ազովի ծովերում նավերի վրա հարձակումներ։

Նույն աղբյուրը պնդում է, որ դրան ի պատասխան ռուսական ուժերը սկսել են համակարգված հարվածներ հասցնել Կիևում գտնվող ռազմական օբյեկտներին և Օդեսայի մարզի նավահանգստային ենթակառուցվածքներին։

Արդյունքում գրեթե ամբողջությամբ դադարել է գյուղատնտեսական արտադրանքի և պողպատի ծովային արտահանումը։ Աղբյուրը, հղում անելով տնտեսագետների հաշվարկներին, նշում է, որ Ուկրաինայի օրական կորուստները գնահատվում են 70 մլն դոլար։ Նշվում է նաև, որ ռուսական ուժերը շարունակում են հարվածներ հասցնել Ուկրաինայի նավահանգիստներին և նավերին, որոնք, ըստ հրապարակման, ռազմական բեռներ են տեղափոխում ուկրաինական կողմի վերահսկողության տակ գտնվող տարածքներ։

Ուկրաինացի որոշ ռազմական վերլուծաբաններ քննադատում են Ռուսաստանի տարածքին հասցվող հարվածների շարունակումը և Զելենսկիին կոչ են անում հրաժարվել դրանցից։ Հրապարակման մեկնաբանությամբ՝ Զելենսկու վերջին հայտարարությունը վկայում է, որ նա մտադիր է շարունակել և ուժեղացնել Ռուսաստանի դեմ գործողությունները։