Իրաքում սկսվել է Ֆրանսիայի վեց քաղաքացիների դատավարությունը, որոնք կասկածվում են ԻՊ-ի հետ կապերի մեջ

Կիրակի օրը Իրաքում սկսվել է Ֆրանսիայի վեց քաղաքացիների դատավարությունը, որոնք կասկածվում են «Իսլամական պետություն» ահաբեկչական խմբավորման հետ կապերի մեջ, հաղորդում է AFP-ն։

Նրանց գործը քննվում է խմբավորման ենթադրյալ հազարավոր անդամների պատասխանատվության ենթարկելու լայնածավալ գործընթացի ֆոնին, որոնք տեղափոխվել են հարևան Սիրիայի բանտերից։

Վեց ֆրանսիացիների դատավարությունը սկսվել է առավոտյան Բաղդադում, AFP-ին հայտնել է դատական մարմինների աղբյուրը։ Գործակալության թղթակիցը դատարանի շենքի մոտ նկատել է կալանավորների տեղափոխման մեքենաներ և ֆրանսիացի դիվանագետների ավտոմեքենաներ։

Վեց մեղադրյալների ինքնությունն առայժմ չի բացահայտվում։ Նրանք մտնում են Ֆրանսիայի 47 քաղաքացիներից բաղկացած խմբի մեջ, որոնք անցյալ տարի Սիրիայից տեղափոխվել են Իրաք։ Այդ մարդկանց թվում է Ադրիեն Գյալը, որը ԻՊ-ի անունից ստանձնել էր պատասխանատվությունը 2016 թվականին Նիցցայում տեղի ունեցած ահաբեկչության համար։ Հարձակման հետևանքով զոհվել էր 86 մարդ։

ԻՊ-ն 2014 թվականին գրավել էր Սիրիայի և Իրաքի զգալի տարածքներ։ Գրոհայինները զանգվածային սպանություններ էին կատարում, ինչպես նաև առևանգում էին կանանց և աղջիկներին ու նրանց տանում սեռական ստրկության։ Միջազգային կոալիցիայի աջակցությամբ Իրաքը 2017 թվականին հայտարարել էր խմբավորման նկատմամբ հաղթանակի մասին, իսկ քրդերի գլխավորած Սիրիայի ժողովրդավարական ուժերը երկու տարի անց վերջնականապես ջախջախեցին դրա հիմնական կազմավորումները Սիրիայում։

Սակայն Իրաքի իշխանությունները շարունակում են հետաքննել ԻՊ-ի հանցագործությունները։ Երկրում դեռևս կան խմբավորման զոհերի զանգվածային գերեզմաններ և նրա կատարած հանցագործությունների ապացույցներ։ Իրաքի դատարանները նախկինում հարյուրավոր մահապատիժների և ցմահ ազատազրկման դատավճիռներ էին կայացրել օտարերկրացիների և երկրի քաղաքացիների նկատմամբ, որոնք դատապարտվել էին ահաբեկչության գործերով։

2019 թվականին Ֆրանսիայի 11 քաղաքացիներ Իրաքում դատապարտվել էին մահապատժի, սակայն ավելի ուշ նրանց պատիժը փոխարինվել էր ցմահ ազատազրկմամբ։ Իրավապաշտպան կազմակերպությունները քննադատել էին Իրաքում ահաբեկչության մեջ մեղադրվող անձանց դատավարությունները՝ հայտարարելով դատական ընթացակարգերի թերությունների մասին։

Փետրվարին ԱՄՆ-ն Իրաքին էր փոխանցել ԻՊ-ի հետ կապերի մեջ կասկածվող ավելի քան 5700 անձանց՝ ավելի քան 60 երկրից։ Նախքան այդ նրանք տարիներ շարունակ գտնվել էին Սիրիայի տարածքում՝ քրդերի գլխավորած ուժերի վերահսկողության տակ գտնվող բանտերում։ Փոխանցվածների թվում եղել էին առնվազն հինգ Ֆրանսիայի քաղաքացիներ, որոնցից ոմանք անչափահաս էին եղել, երբ նրանց ծնողները միացել էին ԻՊ-ին։