Թեհրանում փակվել է Ֆրանսիայի դեսպանատան հետ կապված լեզվական կենտրոնը

Թեհրանում դատախազության կարգադրությամբ փակվել է Իրանում Ֆրանսիայի դեսպանատան հետ կապված CLF լեզվական կենտրոնը, հայտնում է Tasnim-ը։

Ինչպես հայտարարել է իրանական կողմը, կենտրոնը կնքվել է մի գործունեության պատճառով, որն իշխանությունները համարում են անօրինական, ինչպես նաև Ֆրանսիայի գործողությունների ֆոնին, որոնք, Թեհրանի գնահատմամբ, դուրս էին գալիս ընդունված դիվանագիտական նորմերի շրջանակից։

Իրանի իշխանությունների տվյալներով, կենտրոնին բազմիցս զգուշացրել էին երկրի օրենքներին և կանոններին համապատասխան աշխատանքի թույլտվություն ստանալու անհրաժեշտության մասին։ Սակայն հաստատությունը հրաժարվել էր կատարել այդ պահանջը։

CLF-ի փակման որոշումը կայացրել է Թեհրանի դատախազությունը։ Իրանի իշխանությունները հայտարարել են, որ կենտրոնը մի քանի տարվա ընթացքում գործել է լեզուների դասավանդմամբ զբաղվող հաստատության անվան տակ։

Միաժամանակ իրանական կողմը մեղադրել է CLF-ին կրթական գործունեությունն օգտագործելու մեջ՝ իրանական իսլամական մշակույթի և ազգային անվտանգության դեմ ուղղված նախագծեր իրականացնելու համար։

Բացի այդ, Իրանի իշխանությունները պնդում են, որ կենտրոնի աշխատակիցները զբաղվել են տեղական մտավորական էլիտայի ներկայացուցիչների բացահայտմամբ, նրանց հետ կապերի հաստատմամբ և երկրից նրանց մեկնելուն աջակցելով։

Հաղորդագրության մեջ չեն ներկայացվում ենթադրյալ խախտումների մանրամասները, ինչպես նաև չի հստակեցվում, թե արդյոք կենտրոնի գործունեության կապակցությամբ որևէ մեկի նկատմամբ կոնկրետ մեղադրանքներ են առաջադրվել։