Բաքուն հայկական կողմին մեղադրում է Դադիվանքից մշակութային արժեքներ «գողանալու» մեջ

Ադրբեջանը շարունակում է պնդել, թե Դադիվանքը Կովկասյան Աղվանքի ժառանգություն է՝ միաժամանակ հայկական կողմին մեղադրելով վանական համալիրից որմնանկարներ, խաչքարեր և այլ մշակութային արժեքներ Հայաստան տեղափոխելու մեջ. գրում է Ազատությունը։

Ադրբեջանի մշակութային ժառանգության պահպանության, զարգացման և վերականգնման պետական ծառայության ղեկավար Սաբինա Հաջիևայի խոսքով՝ Դադիվանքից հանված որմնանկարների և խաչքարերի վերաբերյալ տեղեկությունները 2025 թվականի հոկտեմբերին փոխանցվել են Ինտերպոլին և ներառվել «Գողացված արվեստի գործեր» տվյալների բազայում։

Հաջիևան պնդել է, որ 2020 թվականի պատերազմից հետո Քելբաջարից հայկական ուժերի հեռանալու ժամանակ Դադիվանքից Հայաստան են տեղափոխվել խաչեր ու զանգեր, իսկ որոշ որմնանկարներ՝ հանվել պատերից։ Նա նաև հայկական կողմին մեղադրել է այդ արժեքներն արտերկրում որպես հայկական արվեստ ներկայացնելու մեջ։

Ադրբեջանական կողմը քննադատել է նաև Դադիվանքում 1997-2011 թվականներին Հայաստանի և Հայ առաքելական եկեղեցու միջոցներով իրականացված վերականգնողական աշխատանքները՝ պնդելով, որ դրանք փոխել են համալիրի սկզբնական տեսքը։

Հայտարարությունները հնչում են Ղարաբաղի հայկական մշակութային ժառանգության շուրջ հերթական վեճի ֆոնին։ Ավելի վաղ Ադրբեջանի նախագահի օգնական Հիքմեթ Հաջիևը Բաքվում հավատարմագրված օտարերկրյա դիվանագետների այցելության ընթացքում Գանձասարն ու Դադիվանքը ներկայացրել էր որպես Կովկասյան Աղվանքի ժառանգություն։