Յելոուսթոունի սուպերհրաբխի ժայթքումը կարող է ժամանակավորապես դանդաղեցնել գլոբալ տաքացումը

ԱՄՆ-ի Վայոմինգ նահանգում գտնվող Յելոուսթոունի սուպերհրաբխի հզոր ժայթքման դեպքում կարող է սկսվել այսպես կոչված «հրաբխային ձմեռ», որը ժամանակավորապես կթուլացնի մարդու գործունեությամբ պայմանավորված գլոբալ տաքացման ազդեցությունը։ Այս մասին РИА Новости-ին հայտնել է ամերիկացի կլիմայագետ, Climate Central կենտրոնի փոխնախագահ Քրիստինա Դալը։

Փորձագետի խոսքով՝ խոշոր ժայթքման ժամանակ մթնոլորտ արտանետված մասնիկներն ու ծծմբային միացությունները կարող են նվազեցնել Երկրի մակերևույթ հասնող արևային ճառագայթման քանակը և ժամանակավոր սառեցման ազդեցություն առաջացնել։

Որպես օրինակ Դալը հիշեցրել է 1991 թվականին Ֆիլիպիններում Պինատուբո հրաբխի ժայթքումը, որից հետո գլոբալ ջերմաստիճանը որոշ ժամանակով նվազել էր։

Միաժամանակ նյութում Յելոուսթոունի հնարավոր մոտալուտ ժայթքումը կապվում է հուլիսին կալդերայի շրջանում գրանցված երկրաշարժի հետ, սակայն միայն սեյսմիկ ակտիվությունը ինքնին չի նշանակում, որ սուպերհրաբխի խոշոր ժայթքումն անխուսափելի կամ մոտալուտ է։