Անկախության 35-ամյակին Մարտունիում ու Վարդենիսում բարձրացվել են ՀՀ մեծ Եռագույնները

Հայաստանի Անկախության 35-ամյակի միջոցառումների շրջանակում Գեղարքունիքի մարզի Մարտունի և Վարդենիս քաղաքների կենտրոնական հրապարակներում նորակառույց պատվանդանների վրա բարձրացվել են Հայաստանի Հանրապետության մեծ Եռագույն դրոշները։

Վարդենիսում դրոշը հանդիսավորությամբ բարձրացրել են Գեղարքունիքի մարզպետ Կարեն Սարգսյանը և համայնքի ղեկավար Ահարոն Խաչատրյանը։ Արարողությանը օրհնանքի խոսքով հանդես է եկել Վարդենիսի և տարածաշրջանի հոգևոր հովիվ Տեր Հարություն քահանա Հունանյանը։ Միջոցառումն ուղեկցվել է ՀՀ օրհներգի կենդանի կատարմամբ և մշակութային ծրագրով։

Մեծ Եռագույն է բարձրացվել նաև Մարտունու կենտրոնական հրապարակում։ Արարողությանը մասնակցել են Կարեն Սարգսյանը և Մարտունի համայնքի ղեկավար Հովհաննես Հովեյանը։ Միջոցառումն ուղեկցվել է համերգային ծրագրով։

Վարդենիսում և Մարտունիում Եռագույնի նոր պատվանդանները կառուցվել են համայնքապետարանների ֆինանսավորմամբ։ Յուրաքանչյուր ծրագրի համար հատկացվել է 16 միլիոն 230 հազար դրամ։