Գիտնականները Ալցհեյմերի հիվանդության դեմ պայքարի նոր մոտեցում են փորձարկել

Գիտնականներին հաջողվել է վերականգնել գլխուղեղի իմունային բջիջների աշխատանքը և նվազեցնել նեյրոնների չափազանց բարձր ակտիվությունն Ալցհեյմերի հիվանդության դեպքում։ Նոր մեթոդը հաջողությամբ փորձարկվել է մկների վրա։ Հետազոտությունը հրապարակվել է Science Advances գիտական ամսագրում։

Ալցհեյմերի հիվանդության ժամանակ խաթարվում է միկրոգլիայի՝ գլխուղեղի իմունային բջիջների աշխատանքը։ Դրանք արձագանքում են վնասվածքներին և օգնում պահպանել նյարդային հյուսվածքի բնականոն վիճակը։ Միաժամանակ նեյրոնները կարող են չափազանց ակտիվանալ, ինչը նույնպես համարվում է գլխուղեղի աշխատանքի խանգարման նշան։

Գիտնականները պարզել են, որ այս գործընթացների վրա ազդում են PD-1 և PD-L1 իմունային սպիտակուցները։ Հետազոտողները հատուկ հակամարմնի միջոցով արգելափակել են PD-L1-ի աշխատանքն Ալցհեյմերի հիվանդության մոդել ունեցող մկների մոտ։

Դեղամիջոցն անմիջապես գլխուղեղ ներարկելուց հետո միկրոգլիան սկսել է ավելի ակտիվ արձագանքել վնասված հատվածներին, իսկ նեյրոնների անբնական բարձր ակտիվությունը նվազել է։ Արդյունքները վկայում են գլխուղեղի խանգարված գործառույթների մասնակի վերականգնման մասին։

Միաժամանակ գիտնականները դեռ չեն պարզել՝ արդյոք այս մոտեցումը կարող է դանդաղեցնել հիվանդության զարգացումն ու հիշողության վատթարացումը։

Հետազոտության հեղինակների կարծիքով՝ գլխուղեղում իմունային գործընթացների կառավարումը կարող է Ալցհեյմերի հիվանդության բուժման նոր ուղղություն դառնալ։