Իրանի դեսպան․ «Մենք հասկանում ենք Հայաստանի արտաքին քաղաքականության ռազմավարական վեկտորը»

Իրանի և Հայաստանի համար կարևոր է փոխգործակցություն կառուցել՝ հաշվի առնելով Հայաստանի արտաքին քաղաքականության նոր վեկտորները։ Այս մասին սեպտեմբերի 23-ին «Հայ-իրանական հարաբերությունների տրանսֆորմացիան փոփոխվող ռազմավարական իրադրությունում» համաժողովի ժամանակ հայտարարել է Հայաստանում Իրանի արտակարգ և լիազոր դեսպան Խալիլ Շիրղոլամին։

Նրա խոսքով՝ Իրանը և Եվրամիությունն ու եվրոպական երկրները տարածաշրջանում խաղաղության և կայունության պահպանման, ինչպես նաև Հայաստանի և Ադրբեջանի հարաբերությունների հարցում ունեն ընդհանուր մոտեցումներ։

Դեսպանը նշել է, որ խոսքը Հայաստանի՝ դեպի Արևմուտք ուղղված արտաքին քաղաքական կուրսի և դրան զուգահեռ հայ-իրանական գործընկերության նախկին մակարդակը պահպանելու անհրաժեշտության մասին է։

«Սա բարդագույն խնդիր է, բայց այն իր մեջ պարունակում է նաև բազմաթիվ հնարավորություններ։ Հայաստանի և Իրանի ղեկավարների միջև առկա խոր վստահության շնորհիվ կկարողանանք ոչ միայն պահպանել համագործակցության ընթացիկ մակարդակը, այլև այն դուրս բերել որակապես նոր փուլ։ Մենք դիտարկում և ծրագրում ենք Իրանի ու Հայաստանի միջև ռազմավարական գործընկերություն, ինչպես նաև ձգտում ենք ինստիտուցիոնալացնել այդ գործընկերությունը»,- ասել է Շիրղոլամին։

Նա ընդգծել է, որ դեպի ծով ելք չունեցող Հայաստանը բախվում է բազմաթիվ մարտահրավերների և ունի աշխարհի հետ կապի տարբեր ուղիների, ինչպես նաև տարածաշրջանում կապող հանգույցի իր դերն օգտագործելու անհրաժեշտություն։

«Մենք հասկանում ենք այս իրավիճակը և Հայաստանի արտաքին քաղաքականության ռազմավարական վեկտորը»,- նշել է Իրանի դեսպանը։