«Հայաստանին և Ռուսաստանին սպասվում է երկար և ցավոտ բանակցային գործընթաց»․ Կորտունով

Հայաստանին և Ռուսաստանին սպասվում է բավականին երկար և, հնարավոր է, նույնիսկ ցավոտ բանակցային գործընթաց, որի ընթացքում որոշվելու են երկու երկրների տնտեսական համագործակցության առաջնահերթությունները։ Այս մասին սեպտեմբերի 23-ին հայ-ռուսական հարաբերություններին նվիրված համաժողովի ժամանակ հայտարարել է ռուս քաղաքագետ Անդրեյ Կորտունովը։

Նրա խոսքով՝ Հայաստանը մերձենում է Եվրամիությանը, ինչը ենթադրում է Ռուսաստանի հետ նախկին «ընտանեկան» հարաբերությունների փոփոխություն։ Կորտունովի գնահատմամբ՝ այդ դեպքում հարաբերությունները կարող են ավելի շատ կառուցվել որպես հարևանների միջև գործնական համագործակցություն։

Փորձագետը նշել է, որ դա պարտադիր չի նշանակում Հայաստանի նկատմամբ ոչ բարեկամական վերաբերմունք, սակայն կարող է ենթադրել կողմերի շահերի և հնարավորությունների ավելի կշռադատված համադրում։ Նրա խոսքով՝ Ռուսաստանը, օրինակ, կարող է ավելի խիստ պահանջներ սահմանել հայկական արտահանման որոշ կատեգորիաների նկատմամբ։

Կորտունովի կարծիքով՝ հայ-ռուսական տնտեսական հարաբերությունների հետագա ձևավորման հարցում կարևոր դեր կարող են ունենալ «Գազպրոմ»-ը, «Ռոսատոմ»-ը և «Ռուսական երկաթուղիները», ինչպես նաև երկու երկրների համագործակցությունը բազմակողմ կառույցների շրջանակում։

«Շատ բան կախված կլինի նրանից, թե արդյոք Ռուսաստանն ու Հայաստանը կկարողանան փոխգործակցել որոշակի բազմակողմ կառույցների շրջանակում»,- եզրափակել է ռուս քաղաքագետը։