Ինչո՞ւ է Ադրբեջանը թշնամանքի նոր ալիք հրահրում․ ադրբեջանագետ

Ադրբեջանագետ, պատմաբան Տաթևիկ Հայրապետյանն անդրադարձել է հայկական մշակութային ժառանգության շուրջ ադրբեջանական կողմի վերջին հայտարարություններին և պնդումներին՝ նշելով, որ թեման նոր չէ և տասնամյակներ շարունակ ուսումնասիրվել է հայ պատմաբանների կողմից։

Նրա խոսքով՝ հայկական մշակութային ժառանգությունը «ալբանականացնելու» թեման առկա է դեռ խորհրդային պատմագրության մեջ, և այս հարցերի վերաբերյալ հայ պատմաբանների կողմից բազմաթիվ գիտական ուսումնասիրություններ են հրապարակվել։

Հայրապետյանի գնահատմամբ՝ խնդիրը միայն պատմագիտական չէ, այլև քաղաքական։ Նա պնդում է, որ Լեռնային Ղարաբաղի հարցում տեղի ունեցած զարգացումներից հետո Ադրբեջանը շարունակում է Հայաստանի և հայ ժողովրդի նկատմամբ թշնամանքի քաղաքականությունը։

«Պատերազմը դա միայն ֆիզիկական ոչնչացումը չէ, դա նաև մշակույթի, պատմության և ինքնության դեմ մղվող պայքարն է»,- գրել է Հայրապետյանը՝ հավելելով, որ, իր գնահատմամբ, Ադրբեջանն իր քաղաքականությամբ փորձում է հարցականի տակ դնել հայկական ինքնիշխան պետության գոյության իրավունքը։

Ադրբեջանագետը նաև նշել է, որ նման քաղաքականությանը, իր համոզմամբ, պետք է հակազդել քաղաքական և դիվանագիտական քայլերով՝ չթողնելով հնչող պնդումները անպատասխան։

«Ադրբեջանը հստակ մշակված թշնամանքի քաղաքականություն է վարում, պարբերաբար ակտիվացնում է այն, հիմա այդ փուլերից է»,- գրել է նա։