Ինչպես Իշխան Զաքարյանի ընտանիքը դարձավ Ծաղկաձորի գլխավոր մարզահամալիրի սեփականատեր․ Hetq.am

«Հետք»-ը ներկայացրել է, թե ինչպես է Ծաղկաձորի գլխավոր մարզահամալիրը տարիների ընթացքում անցել մասնավոր սեփականության, և ինչպես են այդ գործընթացների արդյունքում համալիրի սեփականատեր դարձել ԱԺ նախկին պատգամավոր Իշխան Զաքարյանի ընտանիքի հետ կապվող ընկերությունները։

Ըստ հրապարակման՝ 2006 թվականին «Ծաղկաձոր գլխավոր մարզահամալիր» ՓԲԸ-ի գույքը 50 տարով վարձակալության է հանձնվել ամերիկահայ գործարար Ալբերտ Բոյաջյանին պատկանող «Նյու հորիզոն գրուպ ինկ» ընկերությանը։ 2010 թվականին Կառավարության որոշմամբ վարձակալված անշարժ գույքի մի մասը նույն ընկերությանը ուղղակի վաճառքով օտարվել է։

«Հետք»-ի տվյալներով՝ 2022 թվականին «Նյու հորիզոն գրուպ ինկ»-ը հիմնադրել է «Ծաղկաձորի սպորտային համալիր» ՍՊԸ-ն, որը ձեռք է բերել «Ծաղկաձոր գլխավոր մարզահամալիր» ՓԲԸ-ի հողերի և շենք-շինությունների մնացած մասը։ Միաժամանակ ավելի քան 37 հեկտար հողատարածք նորաստեղծ ընկերությանը վարձակալության է հանձնվել մինչև 2056 թվականը։

Հրապարակման համաձայն՝ այս գործարքների արդյունքում Ծաղկաձորի գլխավոր մարզահամալիրը դարձել է Իշխան Զաքարյանի ընտանիքի սեփականությունը։ «Հետք»-ը նաև մանրամասնում է, որ 2010 թվականի ուղղակի վաճառքի շրջանակում օտարվել են հյուրանոցային մասնաշենքեր, սպորտդահլիճներ, մարզական ու տնտեսական նշանակության այլ կառույցներ և ընդհանուր 7.6 հեկտար հողատարածք։ Այդ գույքի շուկայական արժեքը, առանց հողի, գնահատվել է 197.3 մլն դրամ, իսկ հողերի ընդհանուր կադաստրային արժեքը՝ 344 մլն դրամ։ Ընկերությունը գույքի համար վճարել է 541.6 մլն դրամ։