Սաուդյան Արաբիան վերսկսում է նավթամուղի աշխատանքը՝ շրջանցելով Հորմուզը

Սաուդյան Արաբիան որոշել է վերսկսել տարածաշրջանի ամենակարևոր Արևելք-Արևմուտք նավթատարներից մեկի գործունեությունը, որը թույլ կտա Ռիադին նավթ տեղափոխել Հորմուզի նեղուցը շրջանցելով: Խողովակաշարի ածխատանքը դադարեցվել էր սեպտեմբերի սկզբին՝ Իրաքից իրականացված անօդաչու թռչող սարքերի հարձակումից հետո։

Սաուդյան Արաբիայի այդ որոշմանն աշխարհի շուկաներն արձագանքեցին նավթի գների անկմամբ: Ըստ տեղեկությունների՝ Ռիադն արդեն սկսել է խողովակաշարի շահագործման առաջին փուլը, և նավթի արտահանումը կարող է վերսկսվել արդեն այս շաբաթվա վերջին։

Մերձավոր Արևելքում պատերազմի և հիմնական երթուղիներով էներգառեսուրսների մատակարարումների խափանման պատճառով տարեսկզբից նավթն աշխարհում թանկացել է ավելի քան 60 տոկոսով։ Արևելք-Արևմուտք նավթամուղը Սաուդյան Արաբիային թույլ էր տալիս նավթի առևտուր իրականացնել՝ շրջանցելով Իրանի կողմից արգելափակված Հորմուզի նեղուցը:

Ըստ Reuters-ի՝ վկայակոչելով վերլուծաբաններին և նավերի շարժին հետևող ընկերություններին, այս խողովակաշարով տեղափոխվում է նավթի համաշխարհային ծավալի 4-5%-ը:

1200 կիլոմետր երկարությամբ խողովակաշարը Պարսից ծոցի շրջանում Սաուդյան Արաբիայի նավթահանքերը կապում է Կարմիր ծովի ափի հետ։ Այն կառուցվել է 1980-ականներին՝ ապահովելու նավթի փոխադրումները Հորմուզի նեղուցը շրջանցելով, որն այդ ժամանակ սպառնալիքի տակ էր Իրան-Իրաք պատերազմի պատճառով։

Ընդհանուր առմամբ, Սաուդյան Արաբիայի նավթային ենթակառուցվածքը շարունակում է խոցելի լինել Իրանի աջակցությամբ գործող Եմենի հութի ապստամբների ռմբակոծությունների պատճառով։