Գազայի վերականգնման համար նախատեսվում է 2.45 մլրդ դոլարի վեցամսյա ծրագիր. Axios

Գազայի հարցերով Խաղաղության խորհուրդը սեպտեմբերի 23-ին նախատեսում է ներկայացնել Գազայի հատվածի վերականգնման վեցամսյա ծրագիր՝ 2.45 մլրդ դոլար ընդհանուր արժեքով։ Այս մասին հայտնում է Axios-ը։

Հանդիպմանը, ըստ հրապարակման, կմասնակցեն շուրջ 35 երկրների ներկայացուցիչներ, այդ թվում՝ Խաղաղության խորհրդի կազմում չընդգրկված պետություններից։ ԱՄՆ նախագահի հատուկ ներկայացուցիչներ Սթիվ Ուիթքոֆն ու Ջարեդ Քուշները հանդես կգան ելույթներով։ Ծրագրի վերաբերյալ ներկայացումներ կանեն նաև Խաղաղության խորհրդի բարձր ներկայացուցիչ Նիկոլայ Մլադենովը և խորհրդի անդամ, Մեծ Բրիտանիայի նախկին վարչապետ Թոնի Բլերը։

Նախատեսվում է 2.45 մլրդ դոլարը ուղղել 66 ծրագրերի ֆինանսավորմանը, այդ թվում՝ ժամանակավոր բնակարանների կառուցմանը, փլատակների մաքրմանը, հիվանդանոցների վերականգնմանը, տնտեսության վերագործարկմանը և բազմազգ անվտանգության ուժերի տեղակայմանը։

Ծրագրով ժամանակավոր կացարանների համար նախատեսվում է 400 մլն դոլար, փլատակների մաքրման և չպայթած զինամթերքի վնասազերծման համար՝ 275 մլն, հիվանդանոցների վերականգնման համար՝ 50 մլն, իսկ ճանապարհների վերանորոգման համար՝ 30 մլն դոլար։ Մոտ 885 մլն դոլար նախատեսվում է հատկացնել անվտանգության ոլորտի ծրագրերին, իսկ շուրջ 300 մլն՝ առողջապահության, կրթության և սոցիալական աջակցության ծրագրերին։

Մոտ 400 մլն դոլար կուղղվի տեղահանված պաղեստինցիների համար ջերմամեկուսացված բնակելի կցավագոնների ձեռքբերմանը։ Եվս 20 մլն դոլար նախատեսվում է հատկացնել զենքի հանձնման ծրագրին, որի շրջանակում զինված խմբավորումների, այդ թվում՝ ՀԱՄԱՍ-ի անդամները կարող են հանձնել զենքն ու զինամթերքը՝ դրանց հետագա ոչնչացման համար։

Axios-ը նշում է, որ ծրագրի իրականացման համար անհրաժեշտ կլինի Իսրայելի և ՀԱՄԱՍ-ի համագործակցությունը։ Խորհուրդը հույս ունի, որ քաղաքական խոչընդոտների վերացումից հետո դոնոր երկրները կմիանան ծրագրերի ֆինանսավորմանը։

Միաժամանակ գնահատվում է, որ Գազայի հատվածին հասցված նյութական վնասը կազմում է մոտ 35.2 մլրդ դոլար, իսկ առաջիկա տասը տարիների ընթացքում ամբողջական վերականգնման և վերակառուցման համար կարող է պահանջվել մոտ 71.4 մլրդ դոլար։