600 մլն դրամ՝ «Հրազդան» մարզադաշտի վերանորոգման համար․ ինչու՞ են վերանորոգելու մարզադաշտը

Կառավարությունը 600 մլն դրամ կտրամադրի «Հրազդան» մարզադաշտի վազքուղու և անհրաժեշտ ենթակառուցվածքների վերակառուցման ու վերանորոգման համար։ Որոշումն ընդունվել է սեպտեմբերի 24-ի նիստում։

Աշխատանքները նախատեսվում է իրականացնել 2027 թվականին Հայաստանում կայանալիք Ֆրանկոֆոնիայի խաղերին ընդառաջ։ Գնումը համարվել է անհետաձգելի և կիրականացվի «Հրատապ մեկ անձից» ընթացակարգով։ Պայմանագիրը նախատեսվում է կնքել «Ջի ԹԻ ԷՍ Քնսթրաքշն» ՍՊԸ-ի հետ։

Նշվում է, որ մարզադաշտի վազքուղու ռետինե ծածկի և դրա տեղադրման համար անհրաժեշտ ստորին շերտերի աշխատանքները կիրականացվեն առանձին գնման ընթացակարգով։

Տեխնիկական ուսումնասիրության համաձայն՝ մարզադաշտում միջոցառումների ժամանակ հնարավոր կլինի տեղավորել շուրջ 21 հազար 566 հանդիսատես։

Քանի որ պետական միջոցները ներդրվելու են մասնավոր սեփականություն հանդիսացող մարզադաշտի բարելավման համար, ԿԳՄՍ նախարարությունը երեք ամսվա ընթացքում պետք է Կառավարություն ներկայացնի նախագիծ՝ մարզադաշտը առաջիկա 20 տարիներին պետական ծրագրերի համար օգտագործելու պայմանների վերաբերյալ։

Ֆրանկոֆոնիայի խաղերը Հայաստանում կանցկացվեն 2027 թվականի հուլիսի 23-ից օգոստոսի 1-ը։