44-օրյա պատերազմի հերոս Արմեն Առաքելյանի ծննդյան օրն է այսօր

Այսօր 44-օրյա պատերազմի հերոս Արմեն Առաքելյանի ծննդյան օրն է։ Նա ծնվել է 1996 թվականի սեպտեմբերի 25-ին՝ Քաջարան քաղաքում։

Արմենը սովորել է Քաջարանի թիվ 2 միջնակարգ դպրոցում, ապա՝ Երևանի օլիմպիական հերթափոխի պետական մարզական քոլեջում։ 2013 թվականին ընդունվել է Ֆիզիկական կուլտուրայի հայկական պետական ինստիտուտ։ 2015 թվականին զորակոչվել է բանակ և ծառայել Մատաղիսում ու Թալիշում։ Ապրիլյան պատերազմի ընթացքում ծառայել է այն զորամասում, որն առաջիններից էր մտել մարտի մեջ։ Ցուցաբերած քաջության համար պարգևատրվել է «Արիության» մեդալով։

2017 թվականին զորացրվելուց հետո Արմենն աշխատանքի է անցել «Զանգեզուրի ՊՄԿ» ՓԲԸ-ում՝ որպես անվտանգության աշխատակից։ Կրթությունը շարունակել է հեռակա ուսուցմամբ և ավարտել 2020 թվականին։

2020 թվականի սեպտեմբերի 28-ին Արմենը կամավորագրվել է և մեկնել Արցախ։ Ռազմաճակատի հարավում նա միացել է Քյարամ Սլոյանի անունը կրող եզդիական ջոկատին։ Ըստ «Սյունյաց երկիր» պարբերականի՝ ջոկատի հրամանատար Ռզգոն Արմենին նախազգուշացրել էր խիստ կարգապահության մասին, ինչին նա պատասխանել էր, որ հենց կարգապահությունն ու կազմակերպվածությունն են իրեն գրավել այդ ջոկատում։

Արմենը մի քանի օր անց վերադարձել է Քաջարան, վերցրել ընտանիքի «Վիլիսը» և կրկին մեկնել ռազմաճակատ։ Ականատեսների վկայությամբ՝ նրան կարելի էր տեսնել առաջնագծի տարբեր հատվածներում․ նա տեղափոխում էր վիրավորներին, հասցնում սնունդ ու ջուր և ապահովում զինակիցներին անհրաժեշտ ռազմամթերքով։

Հոկտեմբերի 13-ին հակառակորդի անօդաչուի հարվածի հետևանքով Արմենը ծանր վիրավորվել է։ Չնայած նա հարվածի պահին խմբից բավական հեռու է եղել, սրտին հասած բեկորը մահացու է դարձել։

Արցախի պաշտպանության համար կյանքը չխնայած Արմեն Առաքելյանը հետմահու պարգևատրվել է «Մարտական ծառայության» մեդալով։ Նա հուղարկավորվել է Քաջարանի զոհված ազատամարտիկների հուշահամալիրում։

Արմեն Առաքելյանի մասին նյութը ներկայացնում է «Սյունյաց երկիր» պարբերականը։