Ռուսաստանն ԱԹՍ-ներով հարվածել է Ուկրաինայի McDonald's-ի պահեստին

Ռուսական զորքերը անօդաչու թռչող սարքերով հարվածներ են հասցրել պահեստին, որն օգտագործում է McDonald's արագ սպասարկման ռեստորանների ցանցը, հայտնել է Ուկրաինայի նախագահ Վոլոդիմիր Զելենսկին։ 

«Հարվածային անօդաչու սարքն ընդդեմ սովորական մթերքների», – ուրբաթ օրը Տելեգրամ-ալիքում գրել է Զելենսկին։ 

Նա նշել է, որ ռուսները մշտապես ընդլայնում են իրենց էսկալացիոն գործողությունը՝ հարվածներ հասցնելով ամերիկյան և այլ բիզնեսներին, տվյալների կենտրոններին, ինտերնետ-պրովայդերներին։ 

«Այս ամենը խաթարում է մարդկանց՝ կապի մեջ մնալու, սովորելու, աշխատելու հնարավորությունները։ Կարևոր է, որ աշխարհն արձագանքի այս ամենին, և որպեսզի Ռուսաստանը զգա իր ահաբեկչության պատասխան քայլերը։ Մեր հեռահարության հնարավորությունները և միջազգային հանրության պատժամիջոցները պետք է համատեղ աշխատեն հենց դրա համար՝ Ռուսաստանի համար կոնկրետ հետևանքների ապահովման նպատակով», – ընդգծել է նախագահը։ 

Ինչպես հաղորդվում էր, Ուկրաինայում McDonald's-ի բոլոր ռեստորաններն աշխատում են անվտանգության ընդլայնված կանոնների պահպանմամբ. օդային տագնապի ժամանակ ռեստորանը ժամանակավորապես դադարեցնում է աշխատանքը, որպեսզի աշխատակիցները և այցելուները կարողանան տեղափոխվել մոտակա ապաստարան, և վերսկսում է սպասարկումը տագնապի ավարտից հետո։ Հաստատության աշխատակիցները ստանում են ամբողջական աշխատավարձ՝ անկախ հերթափոխի ընթացքում ապաստարանում անցկացրած ժամանակից։