ՌԴ Պետդումայում պահանջել են քրեական գործով ստուգել ռեփեր Ջիգանին և նրա կնոջը

ՌԴ Պետդումայի ընտանիքի պաշտպանության հարցերով հանձնաժողովի ղեկավար Նինա Օստանինան դիմել է ՆԳՆ-ին, Գլխավոր դատախազությանը և երեխաների իրավունքների պաշտպանին՝ ռեփեր Ջիգանի և Սամոյլովայի նկատմամբ ստուգում անցկացնելու պահանջով։

Դիմումը հաջորդել է հաղորդումներին, ըստ որոնց՝ հուլիսի 4-ի գիշերը ռեփերը Մոսկվայի մարզում գտնվող իր տանը կրակոցներ է արձակել՝ չորս երեխաների ներկայությամբ։

Պատգամավորը խնդրել է երկու ծնողներին էլ ստուգել ՌԴ Քրեական օրենսգրքի 125-րդ հոդվածով՝ «վտանգի մեջ թողնելը»։ Նա նաև պահանջել է գնահատել ոստիկանության գործողություններն ու զենքի օրինական տիրապետման հանգամանքները։

Օստանինայի խոսքով՝ երեխաների հետ կապված իրավիճակը «հատուկ վերահսկողություն և համալիր ստուգման նախաձեռնում է պահանջում»։

Դեպքի մասին հայտնի է դարձել միայն սեպտեմբերի 23-ին։ Առկա տվյալների համաձայն՝ ռեփերը մի քանի ժամ պահել է տան աշխատակիցներին և վիրավորել անվտանգության աշխատակցին։

Հաղորդվում է, որ այժմ Ջիգանը վերականգնողական կենտրոնում է Իսրայելում։