Բելառուսում հետապնդումից փախած տղամարդուն Վրաստանից տեղափոխել են Հայաստան․ այստեղ նրան ձերբակալել են

Սեպտեմբերի 25-ին Վրաստանում ձերբակալված Բելառուսի քաղաքացի Լև Միխեևին տեղափոխել են Հայաստանի սահման, որտեղ նրան ևս ձերբակալել են։ Այս մասին Միխեևը պատմել է «Позірк» պարբերականին։

Նրա խոսքով՝ Հայաստանում ձերբակալության պատճառը Բելառուսի իշխանությունների պահանջով ԱՊՀ միջպետական հետախուզման մեջ գտնվելն է։

Միխեևը Վրաստանում ապաստան ստանալուն սպասում էր դեռ 2021 թվականից։ Սեպտեմբերի 25-ին նա գնացել է Թբիլիսիից մոտ 30 կմ հեռավորության վրա գտնվող Մարտկոպի գյուղի միգրացիոն ծառայություն՝ ժամանակավոր անձը հաստատող փաստաթուղթը փոխելու համար։

Միխեևի պնդմամբ՝ ավելի ուշ իրեն հայտնել են, որ Վրաստանում ապօրինի է գտնվում, և առաջարկել երկու տարբերակ՝ հարկադրաբար հեռանալ երկրից կամ ինքնուրույն ընտրել այն երկիրը, ուր ցանկանում է մեկնել։

Բելառուս վերադառնալուց նա հրաժարվել է՝ նշելով, որ հենց Բելառուսում հետապնդումների պատճառով է ապաստան խնդրել Վրաստանից։ Որպես մեկնելու երկիր Միխեևն ընտրել է Հայաստանը։

Նրա խոսքով՝ արտաքսման վերաբերյալ դատական նիստ չի անցկացվել։ Միխեևը նաև պնդում է, որ իրեն ստիպել են վրացերենով փաստաթղթեր ստորագրել, որոնց բովանդակությունը չի հասկացել։

Այնուհետև նրան տեղափոխել են հայ-վրացական սահման։ Հայաստանի տարածք անցնելուց հետո Միխեևին ձերբակալել են, քանի որ Մինսկի հարցմամբ նրա անունը ներառված է ԱՊՀ միջպետական հետախուզման ցուցակներում։

Վրաստանում բնակվող բելառուս իրավապաշտպան Ռոման Կիսլյակը հայտնել է, որ ավելի ուշ պարզվել է՝ Թբիլիսիի վերաքննիչ դատարանը Միխեևի գործով որոշում է կայացրել, հավանաբար՝ դեռ հուլիսին։ Կիսլյակը, սակայն, նշել է, որ անձամբ չի տեսել այդ որոշումը և փորձում է պարզել դրա բովանդակությունը։