Լավրովն ու Գերմանիայի ԱԳ նախարարը հանդիպել են 4,5 տարվա ընդմիջումից հետո

Ռուսաստանի արտաքին գործերի նախարար Սերգեյ Լավրովը 4,5 տարվա ընթացքում առաջին անգամ հանդիպել է Գերմանիայի արտաքին գործերի նախարարի հետ։

Լավրովի և Գերմանիայի ԱԳ նախարար Յոհան Վադեֆուլի հանդիպման մասին հայտնել է ՌԴ ԱԳՆ պաշտոնական ներկայացուցիչ Մարիա Զախարովան։

Նրա խոսքով՝ բանակցությունների անցկացման նախաձեռնությունը եղել է գերմանական կողմինը։

Զախարովան նաև պնդել է, որ հանդիպումից առաջ Գերմանիայի ԱԳՆ աշխատակիցները մի շարք պահանջներ են ներկայացրել լրատվամիջոցների աշխատանքի վերաբերյալ։

Մասնավորապես, ըստ նրա, գերմանական կողմը պահանջել է սահմանափակել լրագրողների մուտքը, երաշխավորել, որ նախարարներին հարցեր չեն ուղղվի, ինչպես նաև չձայնագրել հանդիպման սկզբում հնչող խոսքերը։

Բացի այդ, Զախարովայի խոսքով՝ գերմանական կողմը պահանջել է սահմանափակում սահմանել հանդիպման վերաբերյալ նյութերի հրապարակման ժամկետի վրա։

Լավրովի և Վադեֆուլի հանդիպումը վերջին 4,5 տարվա ընթացքում Ռուսաստանի և Գերմանիայի արտաքին գործերի նախարարների առաջին հանդիպումն է։