Politico. ԵՄ-ն աշխատում է Ուկրաինայի՝ դաշինքին անդամակցության ճանապարհային քարտեզների վրա

Եվրամիությունը (ԵՄ) սկսել է մշակել չորս թեկնածու երկրների համար անդամակցության հստակ, քայլ առ քայլ ծրագրեր, հաղորդում է Politico-ն՝ հղում անելով աղբյուրներին։

Աղբյուրների համաձայն՝ Եվրահանձնաժողովի ներկայացուցիչները աշխատում են Ալբանիայի, Մոլդովայի, Ուկրաինայի և Չեռնոգորիայի համար նախատեսված «ճանապարհային քարտեզների» վրա։ Այս երկրները համարվում են ԵՄ անդամակցության հիմնական հավակնորդներ, սակայն դրանց ընդունման գործընթացը ձգձգվում է, նշել է թերթը։ Նոր գործողությունների ծրագրերը, առաջին անգամ, նրանց կտրամադրեն հստակ երաշխիքներ և վերջնաժամկետներ անդամակցության բանակցություններն ավարտելու համար։ Թերթը հավելել է, որ «ճանապարհային քարտեզները» կսահմանեն, թե ինչ է պահանջվում յուրաքանչյուր թեկնածու երկրից, ինչպես նաև կստեղծեն պարտավորություններ ԵՄ գործող անդամների համար, որոնք այնուհետև պարտավոր կլինեն համաձայնվել շարունակել ինտեգրման գործընթացը։

Աղբյուրները ընդգծել են, որ Վրաստանին, Բոսնիա և Հերցեգովինային, Կոսովոյին, Հյուսիսային Մակեդոնիային, Սերբիային և Թուրքիային «ճանապարհային քարտեզներ» չեն տրամադրվի, քանի որ նրանք գտնվում են ԵՄ անդամակցության գործընթացի վաղ փուլերում։